Tarawera Tamariki revisit 1880s for eruption commemorations

Aroha Treacher
  • Waikato/Te Waiariki

E kōtahi rau toru tekau ngā tau ki muri i hū ake te maunga o Tarawera, he parekura nui i patua ngā tāngata kōtahi rau rua tekau, ko te nuinga he Māori. I te rā nei i tae atu ngā tauira nō te Kura Kaupapa Māori o Te Koutū, kei te mau hoki i a rātou ngā kākāhū o taua wā ki ngā whakamaumaharatanga.

Kei te whai ēnei tamariki i ngā tapuwae o o rātou tipuna, rātou i mate i te hūnga nui i te tau kōtahi mano waru rau waru tekau mā ono.

E ai ki te Tumuaki o TKKM o Te Koutu a Uenuku Fairhall, “Tokomaha ngā uri o rātou i mate i kōnei kātahi, kārua, kua wehe atu ngā mōrehu i kōnei ka haere, ka hīkoi roa nei māuiui nei wharawhara nei ki Ohinemotu nō reira ko Ngāti Whakaaue whakatau i ngā morehu.”

E ono haora te roa o te hū, he maha ngā pitopito kainga maori i turaki, ā he taonga tino nui aua hītori nui e akohia ana ēnei tamariki.

Hei tā Fairhall, “Engari ko te mate o tēnei ao pouaka whakaata mehemea he whakaaturanga o Tarawera ka pai, engari, kaua e waiho mā te pouaka whakaata me kaha kē tātou ki te kōrero i ēnei kōrero.”

Kua kaha kitea ngā pungarehu e tekau kiromita te tawhiti i te rangi, i turaki hoki ngā waiariki rongonui a māwhero me mā i Rotomahana.

“E kore e wareware i a mātou tēnei o ngā rā nātemea i mate i parekura koia tēnei tētahi o ngā tino parekura i patua nei e tau mai nei ki roto i a mātou,” hei tā Rangitihi Pene nō Tūhourangi Ngāti Wāhiao.

E tupono tonu ana ngā puia i ēnei rā, nā reira, kua tū he purere arotūruki rū whenua kia mōhio ai te motu i te kaha haruru o te maunga.