Tainui-Waikato release their first iwi education strategy

  • Waikato/Te Waiariki

He tuatahitanga te kawenata mātauranga ki waenga i a Waikato-Tainui me ngā kura auraki i tōna rohe whānui. Hei tā te heamana o Te Arataura he rā nui tēnei i te rautaki ā-iwi mō te katoa o ana uri he tekau mā rima pakeke ake hoki ngā tau, kia whai tohu mātauranga i mua i te tau rua mano mā rima.

Ko te tīmatanga o te whanaungatanga hou i waenga i te iwi o Waikato-Tainui me ngēnei kura tuarua auraki tekau mā whā.

E ai ki te Hemana o te Arataura a Rahui Papa, “Neke atu i te whitu tekau mā rima paihēneti o ngā tamariki o Waikato-Tainui kei roto i ngā kura auraki, nō reira, kua tōia mai rātou ki te matapaki e pēwhea te whakawhanake i te mātauranga ki roto i ērā kura.”

Ahu mai ana ngāua kura i te rohe whānui o Waikato-Tainui, mai i raro i Papakura ki runga ki Kirikiriroa, whakateuru ki Whaingaroa, whakaterawhiti ki Matamata.

Hei tā tetahi kaiako nō Te Kāreti o Mārawaatea a Richard Crawford, “He āwhina i te poari o ngā kaitiaki me ngā kaiako.  Kei te āwhina i a mātou, he aha te huarahi tika ki te whai atu, ki te āwhina i ngā tauira katoa o tō mātou kura.”

I tērā tau, e rima ngā kura i whakamātautau i te kaupapa.  Nā ra ka whai hua ngetehi atu kura.

“Ko te whakariterite i ētehi rauemi whakaako i roto i te kura, e hāngai ana ki te marautanga o Aotearoa kātahi, kārua, e hāngai ana ki te marautanga ā te iwi e whakawhanaketia nei,” hei tā Papa.

He rua tekau mā whitu ngā kura auraki te rahi katoa i tae mai I te rā nei. Me te hiahia o rātou kāore i raro i te maru o te kawenata kia wawe hono atu ka tika

Ko te manako o te iwi, ka whakatōpu mai ngā kura toru tekau mā rima katoa o te rohe ki raro i te kaupapa, ā tōnā wā.