Ngā kaupapa: BUDGET, Housing

Tahua 2017: $2-piriona hei hikina te pūtea mo te whānau

Talisa Kupenga
  • Waikato/Te Waiariki

E $2-piriona te pūtea ia tau mo ngā whānau 1.3-miriona puta noa i te motu, hei hiki i te pūtea ā-pūkoro mā te $26 ia wiki. E whai ana tēnei i te $2.23-piriona tāra hei whakatū 34,000 whare ki Tāmaki, engari ko ētahi e kimi āwhina tonu pēra i te rohe o Rotorua. 

E rapu ana a Wetini Mitai-Ngātai me tōna hoa rangatira he ara awhina mō te hunga kainga kore ki Rotorua.

Ko tāna "he take tēnei tuatahi mo te kawanatanga ma rātou ēnei iwi e awhina, ēnei tangata e awhina, i tua atu i tera ka kite tatou kaore e tino awhinatia mai i ēnei hunga na reira kua tahuri etahi o tatou o te hapori ki te awhina i a rātou."

Kua tirohia e ia tētahi tauira whare ohotata i Tauranga. Ko tāna na te nui o te hunga kainga kore i Rotorua me te kakenga o te utu whare tata ki te $400,00 me ū ki tēnei ara.

"Ehara i te mea kaore o rātou mahi kāore hoki o rātou moni heoi ano kāore he nui nga wāhi noho mo rātou, he nui hoki pea te utu o ngā whare,” tā Mitai-Ngātai kōrero.

Ko ta te Minita Take Pūtea a Steven Joyce ko te tīni i te rahi o te tāke, te hiki i te pūtea oranga mō te whānau hoki, ka āwhina i ngā whānau hou, rātou mā he iti ake te moni na te kakenga o te rēti.

Ko tā Mitai-Ngātai "he pai ake i te kore, heoi ano whakarahi ake pea hei awhina i tenei hunga."

Tata ki te whā tekau ngā whare mohoao ka tū i Rotorua hei te mutunga tau, e waru tekau ngā whare papori ka tū a nga tau e toru kei te heke mai. Ka tuwhera te tahua pūtea hou mo te whānau hei tēra Paenga whāwhā.