Kaupapa: Api Mahuika

Tae atu ngā mana nui o te motu ki te tangihanga a Apirana Mahuika

Aroha Treacher
  • Te Tai Rāwhiti

Mapu ana te marae ātea i te mihi kōhukihuki me te tangi tīkapa, i te whakaeketanga atu o ngā ope ki Rāhui Marae ki Tikitiki ki te tangihanga o Tākuta Apirana Mahuika.

I waenganui i a rātou, ko ētahi mana nui o te motu, e tohu ana i te kauanuanu mō te tōtara haemata o Ngāti Porou kua tīraha rā.

I tatu mai a Kiingi Tuheitiangā me ētahi anō rangatira Māori mai ngā tōpito maha o te motu ki te poroporoāki i tēnei huia kaimanawa o Ngāti Porou.  Otirā, kei konei hoki te Ope Tauā ki te manāki i te tini maha ka tae mai.

I tau mai te kāhui Ariki o Tainui, otirā, rangatira Māori mai, kaitōrangapū atu, katoa i tae mai ki tauawhi i te iwi o Ngāti Porou, me te kaha o ngā whaikōrero i tukuna.

Hei whakangāwari i te mahi o te hau kāinga, i tau mai ngā hoia ki te manaaki i ngā manuhiri tūārangi.

Kua ono tekau ngā tau neke atu a Nanny Kui e mahi ana i te kautā, hei tao kai mō tōna whanaunga tata a Apirana.

Āpōpō ka tukua ia ki tana okiokinga roa i waenganui i ōna tīpuna i te urupa Kaitaha ki Whakawhitirā, otirā ko te  tini ngerongero me tētahi ope Kāwanatanga anō tērā ka tae ake ki te poroporoāki i a ia.