Subtitling revolutionises the way Māori stories are told

Taroi Black
  • Te Tai Tokerau
  • Tāmaki Makaurau
  • Waikato/Te Waiariki
  • Te Tai Hauāuru
  • Te Tai Rāwhiti
  • Te Whanganui-ā-Tara
  • Te Waipounamu

Ko te whakapaoho arorangi i ngā kupu hauraro e whakahōu ana i te āhua o tā mātou whakaputa kōrero Māori ki te ao. Ā, ko ngā kai-tuhi kupu hauraro kei te para i te huarahi mō te whakamahi i ngā hangarau o te wā i ngā whakapaohotanga o te ao hurihuri nei. I piri atu a Taroi Black ki wā mātou kai-tuhi kupu hauraro mō ngā piki me ngā heke i wā rātou mahi.

Mai i te kaikawe kōrero e tuhi ana i roto i te reo māori me te reo pākeha, ki te tira kupu hauraro, ka tuku atu i ngā kupu hauraro ki te pouaka whakaata

Mai i reira, ka mahi tahi ngā momo pūkenga katoa, ringa tohu mai, hopu puoro mai, hopu whakaahua mai, kia puta ai ngā hua whakamutunga ki te ao.

Hei tā Babe Kapa, Kaiwhakahaere, "Tēnei mahi, he mahi taumaha. He mahi ki te hopu i ngā mita o tēnei motu. tuarua kia whakarāpopoto i ngā kōrero kia tāea te hunga e mātakitaki ana ki te hopu i te ngako o ngā kōrero.”

Tōna tokowhitu nei te nui o te tira kupu hauraro ka whakapākeha i ngā whakaaturanga rima tekau, ia marama.

Ko tā Kapa, “Te hunga e mātakitaki ana, he hunga kāre e mōhio ana ki tō tātou reo. Tuatahi me kapohia ngā kōrero kia horo te putanga me te ngako.”

Ia rā, ia rā, tōna tekau ki te tekau mā rua ngā pūrongo ka whakapākehatia e ngā karere o Te Kāea, kia paoho arorangi ai ngā kupu hauraro pākeha ki te hōtaka

Hei tā Eva Mahara, Kaiwhakatikatika Reo, “Tekau tau ahau e mahi ana i konei mai i te wā i timata. Kei te taumaha hāere ngā mahi, nātemea kua rerekē haere i roto i ngā tau. Kei te rere arorangi atu ngā kupu hauraro mo ngā rā e whitu mo tēnei hōtaka a Te Kāea hawhe hāora te roa.”

Ko te wero nui mā ngā kai-tuhi kupu hauraro, he whakapākeha i ngā kōrero a ngā karere ka paoho arorangi atu.

Ko tā Harata Brown, Kairipoata, “Ko taku mahi toru tekau meneti i mua i te kōrero he maumahara ki aua kupu rā, kia tāea te hunga e mau ana i aua kupu hauraro te whakauru atu I aua kupu hauraro. i ētahi wā he uaua engari mā te parakatihi ka wāia koe ki aua mahi.”

Tūturu, me kamakama ngā whakaaro o te kai-tuhi kupu hauraro.