Students pay tribute to ‘unique’ leader Awanuiārangi Black

By Mere McLean
  • Waikato/Te Waiariki

Whētuki ana te iwi o Tauranga Moana i te matenga ohorere o to rātou rangatira a Awanuiārangi Black. Nō te rangi nei ka kawea ia ki Te Whetu o Te Rangi Marae, takoto ai.Hei tā Koro Nicholas he tauira ō mua nā Awanuiārangi, ko te hunga mātātahi ka tino rongo i tōna rironga atu i te mea he tino kaiako tēnei ka ngaro nei.

I tae mai a Tauranga Moana ki te whakatau i tō rātou huia kaimanawa. 

E ai ki tētahi kaihaka o Tūtara Kauika a Maia Wharekura, “Kua waipuke katoa te puna o Ōtaua i tēnei noa, o ngā wai koroheke mai i tō tātau awa, tuku noa atu ki ngā pāpāka o Rangataua, kua mate, kua mate, kua mate, mate te uruhanga pāpāka nui.”

He kaiāki a Awanuiārangi kia whakarauora i te reo Māori me ōna tikanga.  He kaikaunihera ia ki runga i te kaunihera taiao o Te Moana Toi, ā, i whawhai ia kia whai reo ai te Māori ki roto i tērā whakaritenga. 

Hei tā tētahi kaiako o Te Wharekura o Tauranga Moana a Koro Nicholas, “Koia tētahi o ngā tangata tuitui i ngā pito katoa kātahi o Tauranga Moana, nō tēnā hapū, nō tēnā hapū, nō tēnā hapū, ā, heoi anō o ngā iwi katoa huri noa i te motu nei ko Awa hoki tērā e taea te tuitui hari i ngā whakapapa i ngā tikanga i ngā kōrero i ngā mita o tēnā, o tēnā, o tēnā.”

I ārahina ia mai te kainga o tōna whānau, pātata ki te Marae, kō atu i te kotahi mano tāngata i tae mai.  Tae noa ki ngā tauira mai i te kura o Otepou, ka heke nei te roimata me te hūpe. 

“Nui tonu wāna kārangarangatanga ānga whakaakoranga ki ana uri whakatipu nei kua waihotia nei ko te kitenga iho o ēnei whakaakoranga ānga ki roto i te tū a ngā tamariki, te rangatahi, ā ngā tāngata katoa o te Marae i tēnei rā,” hei tā Nicholas.

Ka noho tonu a Awanuiārangi ki tōna marae okioki ai tae noa ki te tekau mā tahi karaka o ngā haora o te ata i tēnei Rātapu.  

Tuaritia: