Student fights for recognition of Gisborne land wars history

By Talisa Kupenga
  • Te Tai Rāwhiti

He rangatahi kua tukua he tono ki Te Tāhuhu o te Mātauranga kia whkauru atu nga pakanga o Turanganui-a-Kiwa ki nga marau a-kura o te rohe. He tekau ma ono tau te pakeke o Tahua Pihema, ā, i noho ko ia hei mangai kōrero i te whakawāteahanga o nga iwi e wha kia tū a ia ki te atamira.

E kaha wero ana tēnei rangatahi i Te Tāhuhu o te Mātauranga kia whakauru i nga hitori pakanga o Tūranga ki nga marau a-kura o te rohe.

"He kaupapa tino kaingakau tenei ki au i te mea i te wa i tu te ra whakamaumahara ki Waerenga a Hika i tera tau te mohio au i oku whakapapa i aku hitori mo taku papa kainga no reira i ahua hēmanawa ahau i tēra."

I whai waahi atu ia ki te tuku i tana tono ki nga māngai o te kāwanatanga, i te whakawāteahanga o nga iwi e whā kia tū ki te tuku i tana whakaaturanga ā waha.

Hei tā tētahi Kaitautoko a Ruth Smith, "He kōtiro pūmau ki tōna iwi o Te Tairawhiti nei no reira ki au nei kaore he kōwhiringa tua atu i a ia ki te kokiri i tenei momo kaupapa."

E ai ki tētahi Kaiako o Turanga Wahine a Morehu Nikora, "He mea nui tonu kia rangona tatou i te reo o nga rangatahi i te mea ko ratou na āpōpō, ko ratou na naeanei. Kia whakarongo mai na nga kaiako, nga kura ki nga hiahia i te hunga pera i nga rangatahi ma reira pea e whai wāhi ai i roto i nga akoranga."

Ahakoa kua hipa te wā mōna ko tā Pihema wawata kia ako ngā tauira i tēnei hitori. E whakapono ana ia ka taea te tutuki i tēnei kaupapa i te ekenga angitu o tēnei aronga e nga rohe o Waikato, o Ngāti Whakaue hoki.

Hei tā Pihema, "He hiahia tēnei no tētahi hāpori ehara tēnei i te whakaaro o tētahi tangata. He whakaaro e tautoko nei i te hapori no reira te taea te kore te whakauru i enei matauranga ki roto i o matou kura."

Kaore ano Te Tāhuhu Matauranga kia whakatauria mena ka tautoko rātou i tēnei tono, engari ko tā Pihema me ara ake ratou kia tautoko i te kaupapa. 

Tuaritia: