Ngā kaupapa: Education, Environment, Health

Sawmill workers against poisons advocate dies at 70

By Mere McLean
  • Waikato/Te Waiariki

He waha kōrero mō ngā kaimahi mira rākau i ruia ki ngā paitini kino, ko Hohepa Joseph Harawira, QSM, kua hinga. Neke atu i te rua tekau tau te uri o Ngāti Awa me Ngāi Te Rangi e whawhai ana kia whiwhi awhina ai ngā kaimahi i pākia e ngā paitini kino pēnei i te PCP. I tēnei rā i whakahokia atu ia ki tōna whare tipuna, ki Te Whare o Toroa, i Whakatāne.  

Hohepa Joseph Harawira, he kaiako, kaipakanga, tangata whakaū ki te ngākau mahaki.  

Hei tā Manu Paul (Ngāti Awa), “He tangata puku mahi, engari ngawari te ngākau nē, ngawari, atawhai i te tangata kia ngahoro mai ngā kōrero nē.”

Ko a te pōtiki o ngā tamariki a Fred Turumakina rāua ko Susie Koau Harawira, kāre he kupu to te whānau mo tōna matenga. 

E ai ki te Kaikōrero o te whānau a Joe Harawira, “He mea ohorere tēnei, tēnei matenga nō te ata o nanahi nei i rongo, kāre i te whakapono ko Joe tēnā.”

I noho a Hohepa hei niho tētē kia whakaae mai te kawanatanga o Aotearoa nōnā te hē mo ngā paitini kino i ruia ki ngā kaimahi o ngā mira kani rākau.  Koia tētahi i pāngia ki ngā mate paitini mawaiwaro.

“Koira taku tino aroha ki a ia, ahakoa te tino taumata o te mate ki runga i a ia i pokaikaha tonu ia ki te whakarewa i te waka o SWAP nē,” hei tā Paul.

Ka noho tonu a Hohepa ki runga o Toroa Marae tae noa ki tōna rā nehu hei tēnei Rāpare.