Ngā kaupapa: Entertainment, NZ Music

Rere tonu ana te rongopai i tēnei tau ki te taiopenga East Coast Vibes

Aroha Treacher
  • Te Tai Rāwhiti

Kāhore te hunga ngākaunui ki te reggae i huri kē i te ahurei East Coast Vibes, ahakoa te marangai me te māeke, ā, he kanorau te rārangi kaiwaiata i tū ake ki te whakangahau i te whakaminenga i tēnei tau, te tau tuawhā ia o te taiopenga nei.

Neke atu i te rua mano ngā tāngata i whakarauika mai kia rongo ai ki ngā kaiwaiata rongonui nei.

Hei tā tētahi kaiwaiata, tā Francis Kora, i te nuinga o te wā, he wera katoa i konei heoi i tēnei wā kua kaha heke te marangai.  Tē karo te ua i ngā āhuatanga o te konohete, hei tāna, e kanikani tonu ana te marea.

Ko tā Rio Panapa kōrero, mema o te pēne Sons of Zion, he taiopenga harikoa, he pērā hoki ngā tāngata, ā, he wā pai ki te tūtakitaki ki ngā momo kaipūoro ka taetae atu.

Kia hou tonu ai te rongo, i rāhuitia te inu waipiro.  He ture i whāia e ngā kaiwhakahaere. 

Hei tā Tia Kirk o Good Karma, "Kua tae mai i runga i te hari me te koa me te whakangahau, me te whakanui i tō rātou tairāwhititanga."

I tēnei tau, he kanohi kitea e tū ana hei kaitūao mō te pō whakangahau.

E ai ki a Marama Fox o te Pāti Māori, "Ko te mea pai ko te kōrero o rātou o te Coast nei ngā tāne nei kaha rawa atu rātou ki te patipati i te wahine e rātou e hiahia tīkiti kia uru mai."

He ahurei mā te iwi kāinga kia tōrunga tonu ai te wairua i Te Tairāwhiti mō ngā tau maha kei te heke mai.