Kaupapa: Education

Puna Reo to focus on Kiingitanga teachings

  • Tāmaki Makaurau
  • Waikato/Te Waiariki

He puna reo hōu hei whakaako i ngā akoranga a te kiingitanga ka hangaia ki Manurewa Marae, i Te Tonga o Tāmaki. He kotahi ira waru tekau mā rima miriona tāra te wāriu o taua kura kōhungahunga, ā i tīmata tōna hanganga i ngā marama e rua ki muri. Hei tā te māngai o te marae, a Tunuiarangi Mclean ka tūwhera ngā tatau ki ngā iwi katoa.

Tupu te toi, ora te toi, whanake te toi, te toi i ahu mai i Hawaiiki - ko te tongikura tēnei a Kiingi Tawhiao e noho nei hei tāwharau mō te puna reo hou nei.

Hei tā Mclean, “Ngā mea ka kuhu mai ki roto i tēnei puna reo, ka haere mai rātou i raro i te korowai o Te Kiingitanga.  Koirā te mea nui, ahakoa nō hea rātou.”

He kaupapa mahingātahi a te Manatū Mātauranga, Waikato-Tainui me te marae.

“I whakaaro nui ai kia whakatūhia tēnei kaupapa o te puna reo ki runga i te marae nei o Manurewa.  Ka whakaae mai tō tātou Kiingi.” 

I ahu mai te kaupapa nei e rima tau ki muri, i te kaitautoko o te Kiingitanga a Eru Thompson i mate ia i te tau rua mano tekau ma wha, rātou ko te marae.  Nō tērā tau i huripokitia te oneone e te Kiingi Māori

“I kawe mai tō tātou Kiingi Māori tōna haki mō te marae nei. I raro anō i te kawenata o te Kiingitanga. I te wā i a mātou e noho ana i tohu mai ai ki hea te puna reo nei e tū ai.  Taku whakaatu ana ki a ia, kei konei e tū ana, ka mea mai a ia, āe me haere tātou.”

Kua rēhitatia te puna reo mā mā ngā nohinohi ono tekau mā rima.  Tekau mā rima ngā kaimahi me ngā pouako.

“Kia taea e te whakauru mai te hītori o Te Kiingitanga ki roto, kia whakatauhia te wairua e ai ki te taonga o te motu ki roto.”

E matapae ana ka tūwhera te kura hei waenganui o te tau e tū nei.