Kaupapa: Indigenous

Protect Ihumātao campaigners to report breach to the UN

  • Tāmaki Makaurau

Hei āpōpō rere atu ai a Pānia Newton rāua ko Delwyn Roberts ki Te Āporo Nui mo Te Wānanga ā-tau o te Whakakotahitanga o ngā Whenua o te Ao. Ki reira tohea ai ngā panonitanga o Te Kaunihera o Tāmaki-makau-rau, me Te Kāwanatanga, i te Whakapuakitanga Whānui o Ngā Mana o Te Tangata ki Ihumātao.

E haere tonu ana ngā mahi whakatūtū o ngā kaitiaki o Ihumātao kia whakahē i te waihangatanga whare o Fletchers.

Ko tā Pania Newton, Save Our Unique Landscape, "Ko to mātou tū ki runga i tēnei kaupapa mo Ihumātao kia whakakorehia i ngā waihanga whare ki runga i tō tātou wāhi tapu, ō tātou wāhi tūpuna hoki nō reira kei konei tātou kia whakakorengia i ngā mahi tā fletchers."

I runga i te matekiri ki te urupare o te kāwanatanga me te kaunihera, e kawe ana a Pania i ōna āwangawanga ki te Wānanga ā-tau o te Whakakotahitanga o ngā Whenua o te Ao.

"Kāore anō te kaunihera me te kawanatanga kua whakawhiti kōrero, whakaaro hoki mo tō mātou nohonga ki te whenua nei nō reira i tēnei wā kei roto mātou i ngā kōti, kei roto hoki i te taraipunara e whawhai ana mo tō tātou whenua anō hoki hei whakatika i ngā hētanga kei Ihumātao."

Ko tā Pania, he wāwāhinga ture kei te haere.

"Ka whāki atu mātou ki a rātou ngā mahi hē o te kāwanatanga i to rātou hokohokona atu o to tātou whenua kia Fletchers i roto i te whakaaro kei roto tonu mātou i te kooti me te taraipiunara hoki mo tēnei whenua."

Ko te wawata kia tāpirihia te whenua o Ihumātao ki te whenua tāpui o Otuataua, hāngai ana ki te kōrero o te Kauihera o Tāmaki-makau-rau i te tau rua mano mā whitu.

"Kei te haere tonu tēnei kaupapa, ka whawhai tonu mātou taenoa ki te hokinga mai o tēnei whenua."

Kua whakarite hui mema Māori te rōpu Reipa mo te wiki e heke mai, ki reira matapaki ai te kaupapa.