Poroteehi ana a Kahungunu ki te ara hīkoi o Craggy Range

Aroha Treacher
  • Te Tai Rāwhiti

 Poroteehi ana te iwi o Ngāti Kahungunu me o rātou kaitaunaki ki waho o te whare wāina o Craggy Range i Te Matau a Māui, nā te ara hīkoi i hangaia e Craggy Range i Te Mata o Rongokako, heoi kāore te iwi kainga i te mōhio, i te whakaae.

He kōtahi rau ngā tāngata e ātete ana mō te ara hīkoi.

"Ānei tā mātou whakautu ka tango, ka whakahokia te whenua ki tōna ake āhuatanga i mua rā i te ara hīkoi ka puta wawe mātou nei," tā Warren Hamlin nō Waimarama.

He rua ira whā kiromita te tawhiti o te ara hīkoi nei, he take e kaikinikini ana ki te mokopuna o Merehine Te Kaa tētahi o ngā rangatira o mua o Te Mata o Rongokako.

"Kei te tangi kē au i ngā whenua o mātou mātua tipuna o te ao kohatu kua whakaruturutu, nā wai kī mā rātou e ruturutu?" tā Hariata Te Ruru Akonga Mohi-Baker.

Tē tāea te iwi i te mōhio i tukuna he tono, i kore hoki rātou i kōrero ki te iwi, heoi i whakaaetia te tono e Te Kaunihera o rohe o Heretaunga.

"Ki te kore rātou i te whai tikanga ki te hanga i taua ara hīkoi me te kōrero hoki te iwi, he mea tinihanga rawa atu tēnā," tā Bridget Allison, kaiporoteehi.

Hei ngā marama heke mai ka tiro i ngā aromatawai i ngā tikanga ahurea o te waahi, ka matapaki, kia āta whakaaro hoki he aha te rongoa pai mō te hapori katoa.