Poi issue taken to the Human Rights Commission

  • Te Tai Tokerau
  • Te Waipounamu

Kua puta whakatau i te Tari Tika Tāngata, kua whiwhi tono rātou e whakahē ana i ngā panoni hou, kāore ngā kapa taitamatāne anake e whakawākia ana i te whakataetae a motu mō ngā kura tuarua.  Kāore rātou i te whakakī, nā wai te tono i tuku.  Otia, kei te rere ngā pātai ā ngā mātanga kapahaka i te rangi nei.

E rongonui ana Ngā toa whakaihu waka o Te Matatini ara, Te Whānau a Apanui mō ā rātou rangi kopikopi me nga whakaaro ahurei.

Ko tēnei poi nā ā rātou kaihaka tāne, wahine hoki, i eke rātou ki te taumata, i ngā tau ki muri.

E pouri ana te Manukura Tāne a Tamati Waka, ki ngā panoni hou, “Ko te rongo ake i tērā whakatau, e kore āhei ngā rōpū tāne ki te poi, tērā pea he hokinga whakamuri tērā.  Kua nehua atu e tātou o tātou tikanga, kua kohatu.  Ko te pātai, āhea tātou ka hoki whakamua ki te kimi tikanga hou mō tātou.”

He āwangawanga nui mō tētehi anō, ko tētehi kaiako kapahaka, kaiwhakawā ā rohe, *ki te Matatini hoki

“Kua taunga kē ngā kura pērā i a Hato Pāora e whakamahi ana i te poi, me te whakamīharo pai o ā rātou mahi, ia tau, ia tau, hoki atu, hoki atu.  E minamina ana te hunga mātakitaki ki ā rātou mahi.  Nō reira i tēnei tau pea, kāore e kitea, nā reira, ka aroha ki a rātou, ka aroha hoki ki te hunga mātakitaki,” hei tā Kimoro Taiepa.

I tukuna e te Komiti Ngā kapa haka Tuarua te ture hou ki runga i tā rātou rārangi pukamata, ara, ka whakawātia ngā rōpū taitamatāne te mita o te reo mō te wāhanga te mau rākau, hei whakakapi i te poi. 

Kāore a Manukura Wahine, Kahurangi Maxwell i te whakaae ki tēnā whakatau, “Ki au nei, kei ngā kura te tikanga mehemea ka hiahia rātou ki te poi, ki te mau rākau ki te aha rānei, ki te aha rānei.  Kua pērā i roto i ngā whakataetae.  Kāre i pērā i roto i ngā whakataetae ā rohe, engari, tae noa ki ngā whakataeate ā motu, kua hiahia rātou ki te panoni i tērā ture.  Kāore au i te tino kite he aha te take i pērā ai.”