Piripi Munro: An eloquent orator of is laid to rest

  • Waikato/Te Waiariki

Mangū ana te marae o Tūrangawaewae i Ngāruawāhia i te poroporoaki mō te kaiwhakataki hui rongonui a Piripi Munro.  Ka riro atu te kaiwhakangahau nō Ngāti Marutūahu ki Hauraki, e ono tekau mā whā ōna tau, i te ringa kaha o aitua i ngā rā e whā ki muri, whai muri i te wā roa ōna e noho māuiui ana.  Anei a Mānia Clarke me tēnei pūrongo.

Nā te pou whakangahau rongonui nei ngā hui kapa haka matua o te motu i whakahihiko, ngā ngākau o te hunga mātakitaki i whakamahana.

Ko ngōna pūkenga katoa i tuku iho mai i tōna koroua i a Te Manea Parata.

“Te kaumatua nei, he pūkorero, he manu tīoriori, nā, koinā e pērā ana a Piripi.  Me kī, i heke mai ana tērā mana ki a ia nē, ki a Piripi.  Tana kaha ki te waiata, tana whai korero, ngā mahi katoa”, hei tā Taipari Munro.

“There has never ever been anybody like Piripi, and there never will be.  Because he made it his mission to find out things about those particular kapa. So when you're talking about pace and timing, he was the man”, hei tā Poto Stephens-Dunn nō Te Rarawa, Ngā Puhi hoki.

He tauira o mua i te kura Māori katorika o Hato Petera, i eke hei whakaihuwaka i te wāhanga Korimako o te whakataetae Manukōrero, i te tau whitu tekau.  Ka poipoia ia i raro i ngā parirau o Te Arikinui Te Atairangi Kāhu.

Ka hoki ngā mahara a Taipari Munro, “I reira a Te Arikinui, i Hato Petera i taua wa, nā Te Arikinui i tuku atu te honore nui nei ki a Piripi.  Ki ahau nei, mai i taua wā, ka tino whakapiri tata raua tahi.  Te kuini rāua ko Piripi.   Nā reira, ko Piripi hoki tētahi o āna hawini. Tana pai ki te kōrero nē, ki te whakatakoto i āna kōrero, me te āhuatanga o tana kōrero, ahakoa i te reo pākehā, reo Māori, te papai hoki! Nō reira, koia ka hiahia Te Arikinui I te wa o ana hui koroneihana ki konei.”  

E rere kau ana nga poroporoaki mō te taonga o te mate, e tīraha mai nei ki mua i te wharenui o Pare Waikato.  Hei tohu mihi whakamutunga, i taurimatia te whānau pani me te hunga kirimate nei e ngā tauira o mua o Hato Petera.

E ai ki a tākuta Lance O’Sullivan he tauira o mua o Hato Petera, “I ō mātou wā i te kura, he tangata pai, nāna i whakaako ki a mātou, ngā taonga tukuiho a ō tātou mātua tūpuna, nō reira, koina te mea, e ora ana tonu kei roto i ahau.”

Ka tahu tōna tūpāpaku i te whare tahu tūpāpaku o Newstead i Kirikiriroa.  Ka whakahokia ngōna pungarehu ki tōna wāhi whakamutunga ki Hikurangi, i Manaia ā tōna wā.