Ohorere katoa ana ētahi tauira kura kaupapa Māori i ngā whakaparahako a Google

  • Te Whanganui-ā-Tara

He ao rangatahi nei te ao hangarau, ā, ka kite rātou i ēnei momo kōrero ia te rā, ia te rā.

Hēoi, hei tā tētahi tauira o Te Wharekura o Ngā Mokopuna, tā Tauawhi Bonilla o Ngāpuhi, Ngāti Porou “he āhua pōuri tēnā ki te kite i ērā momo mahi, i te mea, kei te mahi mātou ia ra, ia rā nā reira ki a au nei, he mea pōuri”

Me te mea tonu rā, e ohorere ana ngā tauira o Te Kura Kaupapa Māori o Ngā Mokopuna i a rātou e tuhituhi ana i te rerenga korero 'Why are Maori' i te whārangi ipurangi o Kūkara.

Hei tā Tauawhi anō he momo pōhēhētanga ā ētahi e whakatutukihia ana e te whārangi nei. “Tērā pea, kāre i pērā ngā Māori i ēnei rā, ētahi o mātou nei ko te nuinga kua whai i te ara tika i aua momo mahi”

E ai ki ngā whārangi ipurangi a Forbes, neke atu i te rua rau piriona taara te wāriu o Kūkara, ā, ka noho rātou i te turanga tuarima mō te tino parani puta noa i te ao. E ai ki a Kūkara anō, ehara nō rātou te hē, i pēnei noa ai ngā hua kimikimi ōna.

Hei taana, “maha ngā rangatahi i ēnei rā ka whakaaro pērā ai ki a mātou o tēnei kura, me ētahi o ngā rangatahi i ērā atu kura nāreira, ae, ki a au nei me tango, kāre he pai mō mātou”

Hēoi anō, mō ngā tauira Māori pērā ia Tauawhi, he momo whakaiti, he momo takahi i te mana o te tangata.

I kii mai tētahi māngai o Kūkara, ko taana kāore rātou i te whakaae ki ērā kimihanga, engari kua noho noho puku rātou mehemea ka tango ērā whakautu i ōna whārangi ipurangi.