Ngā kaupapa: Environment, Indigenous

Ngāti Whare ka whai hua i ngā pūtea awhina

Mere McLean
  • Waikato/Te Waiariki

Kua tuku te kāwanatanga i te rima ira waru miriona tāra ki a Ngāti Whare hei whakatipu rākau Māori, e whitu ira rima miriona te maha, i ngā tau tekau. Koinei te kōrero i puta ake i te Minita Ōhanga ā-Rohe, i a Shane Jones i te whare whakatipu rākau o Minginui.

He tahua pūtea tēnei hei whakatipu i te ringa ōhanga o Ngāti Whare. Ki tā Bronco Carson, Heamana o Te Rūnanga o Ngāti Whare, “he kaupapa nui mo a mātou tamariki, te iwi, he uaua te whakatau i tōku wairua na te tirohanga mo ngā hua e haere mai nei. I roto i te toru tau, rima ira waru miriona mai i te puna tuawhenua toru piriona a te kāwanatanga ka whakatōhia ki roto i tēnei whare whakatipu rākau. Ka haere ēnei pūtea ki te whakaako me te whakawātea tūranga mahi i runga i te hiahia ki te whakawhānui i te kaupapa.

Hei tā Shane Jones, Minita Ōhanga ā-Rohe “kua tatu i a mātou, koia tēnei tētahi huarahi whakapau pūtea ai kia hoki mai ai te oranga o te tangata me te matomato o te whenua, nā, pēna he tangata e whakahē ana horekau aku tikanga ki wā rātou korero.”

Kei te taha tonu te whare whakatipu rākau i te taone iti o Minginui, ā, mo ngā whānau e noho ana ki konei ko rātou ka whai wāhi ki roto i tētahi mahi e ārahi ana i ngā kaupapa whakatipu rākau Māori. Mo Ropata Wiri, kaitiaki ki runga o Te Rūnanga o Ngāti Whare, tuatahi, mehemea ka kite koe tēnei wāhi, kore mahi katoa ngā tāngata.

Ka mutu, mo Hinauri August tētahi o ngā tauira o te kura Toitū o Te Whaiti nui a Toi, “he kaupapa whai hua mo to mātou taone iti, he kaupapa hōu mo konei mo ngā tāngata hoki e noho ana ki konei.” I tēnei wā tokoiwa ngā kaimahi o te whare whakatipu rākau heoi e matapaetia nei ka eke tērā nama ki te iwa tekau.