Ngā kaupapa: Ngāpuhi, Treaty Settlements

Ngāpuhi prepared to go to the United Nations

By Dean Nathan
  • Te Tai Tokerau

Ko Te Whakaminenga o te Ao te mutunga mai mō ngā tono tiriti a Ngāpuhi ina kore e tau tika ki te wā kāinga nei. Koinei tā ngā hapū rangatira o Hokianga, ao ake i te nohonga mutunga a Te Rōpū Whakamana i Te Tiriti o Waitangi ki te kapo i ngā tono tiriti a Ngāpuhi.

Neke atu i te ono tau o ēnei nohoanga i tīmata mai i te kore whakatau tika a te karauna i Te Tiriti o Waitangi me He Whakaputanga.

Ko tā Ahorangi Patu Hohepa, Te Mahurehure, “Kāhore he wāhi hei omanga mā te karauna. Me haere mai ki te kōrero kanohi ki te kanohi he aha āhea whakahokia mai ai te rangatiratanga ō mātou o Ngāpuhi nō te mea kīhai mātou i tuku i te mana whakahaere ki te karauna nā ratou kē i tāhae. Nā me whakaae rātou he tāhae rātou whakahokia mai.”

E mea ana ngā mātua kua oti kē ngā mahi a Te Kotahitanga o ngā hapū o Ngāpuhi me Tūhoronuku.  Ināianei me haere ngātahi.

Hei tā Hinerangi Puru, Kaitutae / Te Waiariki / Te Rarawa, “He nui ngā mahi ki te whakakotahi ia mātou.  Ko tērā te mahi nui tuatahi ki ahau. Te hohou i te rongo hohou kia taea ai ngā whawhai nei.  Nā kia tae ki taua wā ko te kāwana tā tātou hoariri ehara ko tātou anō.”

Nō ngā rā nei ka puta te pūrongo whakamutunga o Maranga Mai e tuku ana mā ngā hapū o Ngāpuhi e arahi i te whakatatūtanga mai o ngā tono tiriti.  Ka mutu, e mea ana rātou inā kore e taea ki konei ka kawea e ngā hapū ki tāwahi ki mua i Te whakaminenga o te Ao.

Hei tā Hohepa, “E tū ai tātou ki te whakahaere ia tātou anō pērā ia Hāmoa pērā ia Tonga pērā ia Fiji.  Mehemea e whakakoretia ana te kaunihera o Te Taitokerau ka tukuna atu ko te kāwanatanga o Ngāpuhi hei whakahaere he aha te mate o tēnā.”

Tuaritia:

Ngā kōrero hāngai: Ngāpuhi, Treaty Settlements