Ngapo Wehi honoured in Te Kaha as Duncan MacIntyre trophy is returned

Mere McLean
  • Waikato/Te Waiariki
  • Te Tai Rāwhiti

Ki Te Whānau a Apanui hoki atu ai te taonga o Te Matatini mō Duncan McIntyre me te kawenga o te mate o Ngapo Wehi ki Te Kaha Marae, inanahi nei.  I tuku te Kapa Haka o Te Whānau a Apanui te taonga nei ki te whānau Wehi i te tangihanga o te tautōhito haka i Waihirere i te marama ka huri.

Rere ana te ihi me te wehi ki runga i te Marae hei tohu whakamaumahara i a Ngapo me tōna hoa rangatira a Pimia Wehi.

He rā hoki tēnei hei whakahoki mai i te taonga mō Duncan McIntyre, ka whakawhiwhi ki ngā toa o Te Matatini, mō tēnei wā ko Te Whānau a Apanui.

Hei tā Muriwai Ihakara (Kaikōrero mō te whānau Wehi), “Ko te whakahoki mai i te taonga na runga i te mōhio e kore rawa Ngapo rāua ko Pimia e whakaae kia puritia e te whānau e te taonga ra rā i te mea kāre i riro ki Te Waka Huia.”

Ki roto i ngā whai kōrero i rere ki runga i te Marae i tuku mihi a Te Whānau a Apanui mō te whakahokitanga mai o te taonga.

Ko tā Tamati Waaka (Te Whānau a Apanui), “Te wā i haria mātou ki runga i a Parihimanihi i haria i runga i te mōhio ā tōna wā ka whakahokia mai nē.  Me te mea hoki e whakahoki mai kāre he aha ki a mātou i te mea ka mau tonu te mana o te taonga engari kua tutuki.”

Na Ngapo rāua ko Pimia i arataki i Te Waka Huia, koinei anake te kapa haka kua riro i te taonga mo Duncan Macintyre mo ngā wā e ono. I te whakataetae o Te Matatini kua mahue ake nei i riro te taonga ki Te Whānau a Apanui.

Hei tā Waaka, “He kapa haka noa iho mātou nē, tuarua he iwi mātou engari te taha ki ngā taonga kei a Te Matatini wērā whiriwhiri.” 

E ono marama e toe ana ka tū a Te Matatini.  Ka riro ma Te Whānau a Apanui hei whakahoki i te taonga ki te whakataetae i te wā ka tū te kaupapa ki Heretauranga.