Kaupapa: Entertainment

Ngā tohu Pikihuia 2015

Heeni Brown, Wepiha Te Kanawa
  • Tāmaki Makaurau
  • Te Whanganui-ā-Tara

Kua whakaīngoahia ngā toa whakaihuwaka o ngā whakataetae Pikihuia ka whakamana i ngā mahi miharo a ngā kaituhi, ringarehe Māori.  E hia kē nei ngā kaitono o mua i uru atu anō, ā, i tēnei tau i tutuki tā rātou whāinga. 

Ki te Whanganui-a-Tara tū ai te pō tuku tāonga o Pikihuia, me ētahi o ngā tohunga tuhituhi reo Māori.

Hei tā te Māngai o Huia Publishers, “He pai te kite atu i a rātou, ngā kaituhi hou ngā mea kua hoki ano ki te whakauru ki tēnei whakataetae.”

I tuku tuatahi atu a Aroha Awarau i āna tuhinga he rua tekau mā rima tau ki muri, i a ia e kura tonu ana, engari kāore i eke.  I tēnei tau i toa a Aroha i te wāhanga o te tuhinga kiriata mō āna kōrero o "Puti".

Hei tā Awarau, he kairipoata mō te mōheni Woman’s Weekly, ko tēnei tuhinga kiriata e pā ana ki tētahi kairau, he māmā e mahi ana ki runga i ngā tiriti, ā, ka haria e ia āna tamariki ki te mahi i te mea ka tiaki ia i a rātou i ngā wā wātea.

I tono tuatahi atu hoki a Darryn Joseph i āna mahi rua tekau tau ki muri, engari i whakahē a Timoti Karetu.  E ai ki a Darryn ko Pikihuia te take i uru ai ia ki ngā mahi tuhituhi.

Ā, ko te tuhinga poto a Darryn ko "Taku Ao, Tō Mate Kanehe" te īngoa, i te toa i te wāhanga o ngā tuhinga kōrero poto i roto i te reo Māori.

“He kōrero pāparakāuta, tokotoru ngā hoia kei te kōrero mō tēnei mea te mate kanehe, ā, waiho ake ki reira," hei tā Joseph.

Kua huraina hoki te pukapuka hou a Huia Publishers a "Huia Short Stories 11" he kohinga kōrero o ngā tohunga tuhi Māori o te motu.