Kaupapa: Matariki

Ngā Ringa Raupā - Kura Walker

  • Tāmaki Makaurau

He uri nō ngā kāwai heke o Te Rua Kenana, kua roa e kawe ana i ngā tikanga i tuku iho ki aia, e ōna kuia me ōna pāpara i te wā i a ia e tamariki ana. Heoi koia tēnei ko Nanny Paraoa he kanohi kitea ki te hapori o Papakura, e tohatoha ana i aua mōhiotanga, ana mātauranga, me ana paraoa rēwena ki ngā whānau o te rohe nei.

I kōrero a Te Kāea ki te uri o Ngāi Tūhoe, a Kura Walker, ā, hei tāna, “I au e iwa ana, koira pea taku pakeke, ka whakākohia mai au e taku kuia, taku kuia i whāngai i a ahau, me pēnei te poke paraoa, ana i taua wā kei te mataku au.  Kei te wetiweti katoa ki au ki te whāwhā i ngā pueheu paraoa i ngā aha noa iho, ki taku mōhio kē nā ngā pākeke kē wēra mahi, engari nāna tonu i hotō mai ia au, kia kaha, kia kaha, anei me pēnei me pērā.

Āe, ka oti i a au taku paraoa.  Kaua nei au e rukahu i pai taua paraoa rā, e hē, i rite tonu i te toka, he kōhatu tonu, ka mea mai, kei te pai, koina tō paraoa tuatahi, a muri atu tō paraoa tuarua, tuatoru ae, kua pai ia koe tō paraoa, kua māoa, kua puta pai mai tō paraoa.

Kei te tohatoha au ki waku tuāhine, he pakeke hoki rāua kei konei e noho ana, he uri anō, he whānau, ka hoatu au kia rātou, ka hiahia paraoa āe, mea atu au hokoina mai he puehu paraoa ka pai, koirā, ana kua oti he paraoa mā koutou.

I au i haere ai ki te ako hei kura māhita i te Whare Wānanga o Tāmaki Makaurau me kī, ka uru mai he whakāro kia au i te tau tuatoru e mutu ana taku ako kura māhita, ka whakāro he hoa anō tōku i reira ka korero māua mō ngā mahi rāranga kua tīmatahia e māua.

Koinei kei te haere tonu wēnei mahi i au, kei te rāranga i roto i waku whare kura e mahi ana au, Kura Kaupapa, Kura Reo Rua, Kura Auraki, ana ko ngā māhita i roto i wera kura ka īnoi mai kia haere atu ki te whakāko i wā rātou tamariki i roto i ngā akomanga.

Waku mahi e mahi tonu nei au, kei te manawanui au ki waku mahi, ko te mea nui kei te mahi au ki wa tātou tamariki e haramai nei ki roto i ngā kura, koirā te mea nui, koira te mea e manawanui nei au ki te whakāko ia rātou ki te tohatoha atu i waku mōhio ki wā tātou mokopuna, ki wā tātou tamariki, ahakoa ko wai wēnā tamariki kei te pai katoa ki ahau, ko te tohatoha atu i ngā mōhio e mōhio ana ahau, i wēnei mahi, ana koinā ngā Ringa Raupā kei te haere tonu, kāre he mutunga mai.”