Kaupapa: Matariki

Ngā Ringa Raupā - Beverley Manahi

Wepiha Te Kanawa
  • Tāmaki Makaurau

Ko Beverley Manahi tērā me whakanui mō āna mahi i roto i te ao mātauranga me te hāpai tamariki o Tāmaki ki te uru, engari ko "Whaea Bev" kē tana īngoa e mōhiotia whānuitia.  

Neke atu i te toru tekau tau a ia e whakapau kaha ana mō ngā tauira katoa o Te Kura Kaupapa Māori o Hoani Waititi Marae. 

Hei tā Whaea Bev, "Te takiwā o te toru tekau mā toru tau te roanga o tōku noho ki Waititi, heoi anō toru tekau taku noho mai ki taku kura, Te Kura Kaupapa Māori o Hoani Waititi Marae.

Ko te reo te hā o te tangata, ko tēnā kua roa e ngau ana ki taku ngākau, kua titia taku ngākau.  Ki te kore te iwi Māori e mau tonu ana ki tō tātou reo, ka hinga tō tāua iwi.

He mea nui ki au kia ngāna te iwi Māori ki te whai, kia ora tonu tō tātou reo.

Koia te take kei konei tonu ahau e whakaako tamariki Māori ana.

He nui kē atu ngā wāriu, ngā hua, kua rangona ana e au, te kite atu i ngā tamariki mai i wā rātou kōhungahungatanga, tae noa atu ki tō rātou tae pakeketanga.  Puta atu i te kura ka huri haere i te ao, koirā te āhuatanga o te wā, kei reira kē ngā hua ngā mea hei whakahīkaka i ahau.

Ko te wawata nui mōku ake, ka ora tonu tēnei kaupapa o Waititi Marae, o Hoani Waititi.  Kia kaua rā te kaupapa matua e kōtiti, kia ngana tonu, kia kaha tonu te marae ki te whāngai i te mātauranga Māori.