Ngā Pōtiki a Hinehopu

  • Waikato/Te Waiariki

E tuku wero ana ko te pourākau ko Te Hau Mitai-Ngatai, he mea whakapakari i a rātou ko tana kapa, ko Ngā Pōtiki a Hinehopu.

E tika ana te kōrero, he kanohi hōu ēnei ka kitea ki Te Matatini e haere ake nei.  Engari ko o rātou pukenga, o rātou pūkōrero he mea kite ki te kapa o Te Mātārae I Ōrehu i nga rā kua hori.

E whakapono mārika ana rātou, kātahi te rautaki angitu ko tēnei.  Ko tā Te Hau Mitai-Ngātai, “I tapaina te ingoa nei o Ngā Pōtiki ki a Hinehopu, te tikanga ki roto i ahau me tōku hoa rangaitra, me taku hoa ki a Raimona, kia piri mātou ki a Te Mātārae I Ōrehu i runga i ērā kōrero.  I haere ahau ki tōku tuakana, ki a Wetini, i runga i ērā kōrero me ēra whakaaro kia mōhio mai te ao whānui tonu, ko nga tangata o roto i te rōpū.”

Ki tā Raimona Peni, nōna tonu te mana kaitātaki tane i toa ki ngā whakataetae ā-rohe o Te Arawa, i te tino hiahia ia kia whakaaturia ngā mahi a tōna matua a Te Hau Mitai, ko tāna “kia whakātu ki te ao tēnei momo tū o taku hoa, koia i tautoko i tō rāua karanga kia mana anō te reo o Ngāti Pikiao.”

Tuia katoatia ana ngā kaihaka ki ngā whakapapa o Te Rotoiti, atu i a Ngāti Pikiao, ko Ngāti Rongomai, ko Ngāti Tarāwhai hoki.

Ka anga whakamua te waka o Ngā Pōtiki a Hinehopu ki ngā whakataetae ā-motu hei kapa tuaono mā Te Arawa.  Ko tā Raimona Peni, “he Matatini kei te haere kua tino waimarie a Ngā Pōtiki a Hinehopu, ehara i te mea kei te haere ki te tākaro māpere.  He rōpū hōu engari he rōpū kaha he rōpū pukumahi ki te haka ki te waiata.” 

Kairīpoata:  Heeni Brown