Ngā Kaupapa Here Reo Māori

Heeni Brown
  • Tāmaki Makaurau

E ai ki a Reipa, e hiahia ana ki te whakatōngia te reo Māori ki ia tamaiti kei ngā kura kōhungahunga, kura tuatahi me ngā kura takawaenga, ā, tutuki katoa mai tēnei kaupapa a te tau rua mano rua tekau mā rima. Nō tēnei rā puta ai tō rātou kaupapa here reo Māori ki Tāmaki Makaurau.

I rewaina e te pāti tōnā kaupapa here ki Te Kura Māori o Waatea, he kura tuatahi e tau ana ki Ngā Whare Waatea Marae. 

E mea ana te kaiārahi tuarua o Reipa, a Kelvin Davis ko te utu o tāna kaupapa here he tekau mā whā miriona tāra mō te whā tau, ā, hei hāpai i ngā mahi whakapakari i te reo o ngā kaiako toru mano ia tau.

Tā Kelvin, "Tō mātou hiahia, mā ngā kaiako kia tuituia te reo Māori, ngā rārangi kōrero reo Māori i roto i ngā mahi katoa, hei mua i te tau rua mano rua tekau mā rima. Nā reira he tūmomo compulsory tērā, i te mea me tuituia ngā kaiako ki roto i ō rātou mahi katoa."

Nōnānahi tonu te rangi whakamahara i te haringa o te petihana reo Māori ki Pāremata e whā tekau mā rima tau ki muri.

Me tā Te Rōpū Kākāriki he hiahia whakapau i te kotahi rau ono tekau miriona tāra ki te reo Māori, hei kaupapa ako mātāmua ki ngā kura, mō ngā tau tahi ki ngā tau tekau. Ko te hiahia hoki tā te pāti, kia whai waahi mai tētahi kaiako e mātau ana ki te reo, ki ia rua rau tauira, ki ia kura tuatahi huri noa i te motu hei te rua mano toru tekau.
 
E waru noa iho ngā rā e toe mai ana ki te rangi kōwhiringa matua. A, e mea ana te Pāti Māori hei āpōpo ka puta i a rātou ō rātou hiahia mō te oranga tonutanga o te reo Māori.