Ngā akoranga pākihi nui mā te hunga rangatahi.

Tema Hemi
  • Te Tai Tokerau
  • Tāmaki Makaurau

I karahuihui atu ngā tauira a ngā kura tuarua o Te Taitokerau ki Whāngarei mo tētahi kaupapa hei wawāhi he huarahi ma rātou i ngā mahi pākihi. He rautaki ōhanga e whakaihi ana i te hinonga rangatahi ā ko te whakapae, ka āhei atu ngā tauira ki te whakatinana i o rātou whakāro. 

Mai i ngā hōtaka whakapakari tinana ki ngā pumanawa tautono reo Māori, koirā i hangaia mai e ēnei rakahinonga rangatahi nei.

I ngā rā e toru kua hipa i riro mā ēnei tauira te mātauranga ki te whakatinana i o rātou whakāro pākihi.

Ko tā Huhana Lyndon Kaihautu Te Matārae Education Trust, "Ko tētahi o ngā tino whainga o tēnei kaupapa kia titiro whānui ā tātou taitamariki i roto i ēnei momo mahi pākihi, nōreira kua kite ahau, kua rongo ahau i te kaha me te ngākau nui o te hunga taitamariki o Te Taitokerau i ēnei momo mahi."

Ko ia tauira a ngā rōpu he wāhanga tōna te whakahaerehia kia mārama tōtika ai rātou i te mahi ngātahi, i ngā pukenga kaiarahi hoki. 

Ko tā Lyndon anō, "Ko tētahi o ngā mea nui mo te hunga taitamariki kia mau rātou i ngā kupu, i ngā pukenga o te ao pākihi. I te mea he ao rereke tēra i te ao Māori engari inaianei kei te hoki mai a tātou whenua, o tātou rawa, ngāhere hoki. Me whai wāhi te kanohi Māori i ēnei momo pākihi."

I te rā nei i whakatakotohia e ngā tauira i o rātou whakāro i te aroaro a ngā kaiwhakawā. 

Ko tā te kōrero a Natania Katene Kaikōkiri Rangatahi, Young Enterprise Trust, "Ka whakawāngia rātou na runga i te pai o ta rātou kaupapa me ngā rautaki, ka taea te kohi pūtea hoki. Ka whakawāngia hoki i runga i te whakāro e taea ai tēnei kaupapa te pikau."

E kore e mahue atu ko te kaha o a rātou mahi.

Ko tā Katene anō, "Ka eke panuku tētahi rōpu me te toa i tēnei kaupapa hēoi ko te tino wawata kia motuhake te reo o te hunga rangatahi ki waenga i te hapori me a rātou whakāro hoki."

I tae kē atu te kaupapa nei ki Rotorua. Inaianei ka peka atu te kaupapa nei ki Waikato ki Whakatane hoki hei te Heretiurikōka, ka mutu ki Te Manawatu hei te Mahuru.