Nā te rahi o ngā rākau i raru ngā piriti me ngā awa

Aroha Treacher
  • Te Tai Rāwhiti

Kei te heke haere ngā awa i pākinotia ai te takiwā o Uawa i te mutunga wiki nei. Heoi ko te whakatūpato ki ngā kainoho, me matāra tonu i te ua i tēnei wiki. He maha tonu ngā rori e noho kapi ana, ngā wāhi hoki e noho waipuke ana i te kaha heke o te ua i ngā rangi tata.

Nā te marangai, he pā rākau kua rere mai, ā ehara i te mahi māmā ki te whakapai. 

"He mea nui rawa ki te whakapai ake i ngā rākau, heoi me tatari tātou kia mutu ai te marangai, kia tuku āwhina hoki ki ngā kaipāmu," tā James Pop Milner, Community Links Manager for Uawa.

Ehara tēnei i te wā tuatahi kua rongo te hapori o Uawa i tēnei maiki nui. 

I timata te whakatipu paina i tērā rau tau tonu, heoi anō i roto i ngā tau e rima e ono meheama ka marangi nui ka puta tēnei āhuatanga nā reira kei te ata tiro ki ngā kamupene i te ata nei kua hui katoa matou, ko te mahi nui ko te wānanga i ngā āhuatanga āwhina ki te kore eke o te paina ki rō wai," tā Victor Walker, heamana o Uawanui.

Ko te pātai nui, ka kawea ēnei rākau ki hea? Ko tā Tui Warmenhoven he take nui kia whai rongoā. 

"Ko te take ka whakatōngia he rākau māori, ka tū rātou ki te whenua mō ake tonu atu koira te mea e hiahiatia ana Te Tairāwhiti, he pai noa iho he paina heoi me whakatō rākau māori ki ngā puke teitei rawa," tā Warmenhoven, kaitiaki taiao.

Tekau mā tahi na piriti i te rohe ka raru i ngā pā rākau, waihoki, he ono tekau mā tahi katoa ngā piriti ka tirohia e ngā mana whakahaere hei ngā rā e kainamu mai nei.