Nā te piki haere o te tohanga kai kua whakāturia te rawakoretanga

Heeni Brown
  • Tāmaki Makaurau

Neke atu i te toru mano ngā takoha-kai i tukuna ki ngā whānau i te wāhanga Kirihimete, he kotahi mano pāhera nui ake i ō tērā tau, e ai ki ngā tatauranga a te tāhuhu rangapū o te Whare Mihana o Tāmaki Makaurau.  Hei ko tāna, he tohu tērā kahore i te heke te taimaha o te pōharatanga i runga i ngā whānau, engari kē, kei te piki. 

Ko tā Diane Robertson, ko te nui o te hunga ka tae atu ki te Mīhana ki te kimi koha-kai he tohu paku noa o te rahi o te pōharatanga e ngau nei i te takiwā.

He rua rau rima tekau tāngata ka taea te āwhina e te Mīhana i te rangi kōtahi.  Ā, mō te marama o Hakihea, he toru mano iwa tekau ngā koha-kai i tukuna ki ngā whānau pani.

Me te mea nei, e ono noa iho ngā koha-kai ka taea i te tau kotahi.

I runga anō i tēnā, e hiahia ana a Robertson kia tirohia anō ngā huarahi whakatikatika i te raru nui nei. 

Koirā tāna hiahia nui kia heke iho rawa ngā nama hiahia pouaka-kai mō te Kirihimete, engari ki te kore e rerekē ngā tūāhuatanga o te pōharatanga, e kore e neke ngā nama.