Ngā kaupapa: Kapa Haka, Tainui, Te Reo Māori

Mōtai Tangata Rau to receive Te Reo Excellence Trophy

updated
  • Waikato/Te Waiariki
Mōtai Tangata Rau win Te Reo Excellence Award - Photo / file

Ko te rōpū haka o Waikato-Tainui, a Motai Tangata Rau i tohua ki te taonga a Mobil Oil mō te hiranga o te reo Māori i Te Matatini, i tētahi huihuinga motuhake i te rā nei.

He tohu i warewaretia i te wā tuku taonga o te whakataetae ā-motu ki Ōtautahi, he kotahi marama nei ki muri.

I Rāwhitiroa Marae, i Te Awamutu tā mātou karere a Hone Haunui-Rāpana mō te hui i tēnei rā.

Te tohu kairangi mo te reo kua whakatakotoria ki tōna kāinga hou.

E ai ki a Selwyn Parata, “He pouri nōku nō Te Matatini kaore i pāho i Te Matatini, a kua haramai mātou ki te whakatika i tēnā āhuatanga, a, i riro ia Motai Tangata Rau.”

Ki tā Paraone Gloyne, “Ā, i kī mai kua hapa kua mahue ia rātou te taonga te tuku mai ki a mātou i te wā tika, nō reira ko tā mātou ko Herewini he kimi i tētahi huarahi e Māori ai te homai.”

Koinei te nohonga tuatahi o te reo ki te rārangi mātāmua o Te Matatini.  Nā ia kaiwhakawā te kairangi o te reo i māka, nā tēnā i takaroa te whakawhiwhinga o te kaute whakamutunga.

Hei tā Parata, “Tētahi o ngā Matatini i mua ake nei, kua kōwhitingia kia tokowhā ngā kaiwhakawā mā te reo.  I tēnei Matatini ko ngā kaiwhakawā katoa o te wāhanga whai mana i whakawa i te reo.”

E ai ki a Gloyne, “E noho ana mātou i te whakaiti, i te mea rā ko te taonga ka whakawhiwhia ki te rōpū nā rātou ngā kupu, pai ake e ai ki ngā kaiwhakawā.”

He tuatahi tanga mō Motai Tangata Rau ki te tū ki Te Matatini, kore rawa rātou i hiahia kia whenei anō ki kapa kē.

Hei tā Gloyne, “Kei te rawe te wairua o te kapa haka, a ahakoa nga kōrero e huri haere ana, he aha i takaroa ai, heoi anō me mihi ki te whakaaro rangatira o Herewini otirā o te Kōmiti o Te Matatini ki te whakatika.”

Ki tā Parata, “Me whitiki te hunga kohikohi i ngā kaute, koina te akonga.”

Nā i roto i te whakaaro Māori tukuna atu ai te taonga nei ki tōna tūranga mō te rua tau. 

E ai ki a Gloyne, “Arā ētahi kōrero i te karawhiu haere i Te Matatini he aha te kapa Māori, ana, anei pea he Māori ake ai, ko te reo Māori, kia kaua tātou e wareware.”

Prizegiving, Te Matatini 2015 - Photo / file