Kaupapa: Education

Mō tētehi wharekura nō Tauranga, ko ngā whakamātautau matahiko te anga whakamua

  • Waikato/Te Waiariki

E kaha taunaki ana a Te Wharekura o Mauao i te kaupapa a te kāwanatanga kia whai wāhi ai ngā tauira ki te whakamahi i ngā whakamātautau paerewa a tihi. Ko rātou tētahi o ngā wharekura e waru e whakamātau ana i aua whakamātautau a Te Mana Tohu Mātauranga.

Hei aha te pene me te pepa, ākōkō ake nei ka whēnei kē te whakatutuki i ngā whakamātautau mā ngā taputapu matahiko.

“I kaha ake te rere o ngā whakaaro, i tōku patopato i runga i rorohiko,” i mea atu a Ataraira Cameron, tauira tau 10. “Kāore he uaua rawa atu kia whakaaro mō ngā whakautu. I āhua noa te rere.”

Ko tā tōna hoa, tā Tawa Ngatoko, “He pai ake te rorohiko ki te whakamahi te pene ki runga i te pepa nā te mea, he hōhā ki te whakamahi i te pene ki runga i te pepa.”

Nā Te Mana Tohu Mātauranga Te Wharekura o Mauao i tono kia uru atu i ngā whakamātautau i tā rātou kaha ki ngā marautanga pūtaiao, hangarau, pūkaha me te pāngarau.

E ai ki te Kaiwhakahaere Matua tuarua o Te Tohu Mana Mātauranga, ki a Dary Bean, “Ka mihi ka tika ki Te Wharekura o Mauao. He kura pūtaiao, he kura matahiko. Ko rātou he tauira mō ngā kura katoa.”

Nō te tau rua mano tekau mā rima i whakahaere tuatahi ai te whakamātautau pāngarau ā rorohiko.  I tēnei tau i whakatutuki te Tohu Mātauranga pae tahi NCEA i Te Reo Ingarihi me te Pūtaiao. I whakatutuki ngā tauira tau ngāhuru i te Tohu Mātauranga pae tahi NCEA i Te Reo Rangatira Māori.

Ko Te Wharekura o Mauao tētehi o ngā kura rima tekau mā rima hurinoa i te motu kua whai wāhi ki ngā aromatawai matahiko i ngā whakamātautau. Koinei hoki te tukanga e pai ake ki ngā tauira me ngā pouwhakahaere.

“E kaha tautoko ahau i tēnei i runga i te āhuatanga ki ngā tauira,” i kī atu i a  Heywood Kuka, te Tumuaki tuarua.

“Arā tō rātou ao nē, te mahi ki runga i ngā rorohiko. Ki konā ngā mahi katoa o te tau nō reira, ki te whai tērā o te tau katahi ka huri ki ngā pepa, ngā aromatawai-a-pepa kua āhua rangirua rātou.”

E whakarite ana Te Mana Tohu Mātauranga kia maha ake ngā tūmomo whakamātautau matahiko hei te tau rua mano rua tekau.