Kaupapa: Tūhoe

Mo ētahi whānau o Rūātoki, ka noho tonu te riri ki ngā pirihimana

Mere McLean
  • Waikato/Te Waiariki

 Ko Rameka Teepa me tana whānau ētahi i whakaekehia e ngā pirihimana i raro i a Operation 8 ki Rūātoki i ngā tau e whitu ki muri. Kāre rātou i te hiahia ki te rongo i te kupu whakapāha mai i te kaikōmihana pirihimana o Aotearoa, i tae ā-tinana atu ki Rūātoki inanahi ki te whakahohou i te rongo ki waenga i ētahi o ngā whānau me ngā pirihimana.

E tangi tonu ana te whānau o Rameka Teepa na tōna ngarohanga me te kī kua rewa ngā mahara kino na te kupu whakapāha a ngā pirihimana.

Hei tā Rameka Tuhaka, “Ko taku pāpā tonu, ko Rameka ko tōna kainga i kuhu atu ngā pirihimana ki kona, i a ia i roto i tana kainga me āna mokopuna.”

Nō tērā tau mate ai a Rameka Raymond Teepa.  I te tau rua mano mā whitu, tekau ngā tamariki i tōna kainga i te urutomo mai a ngā pirihimana i a rātou e rapu ana i tana tama a Maraki.  Hei ta Te Waiarani Harawira, pūmau ana tōna riri ki ngā pirihimana.

Inanahi nei i tūtaki te kaikōmihana pirihimana a Mike Bush ki ētahi o ngā whānau ki te tuku kupu whakapāha mō ngā hē a ngā pirihimana i te kaupapa ō Operation 8.  Ki tā te pūrongo IPCA i kino ngā mahi urutomo a ngā pirihimana me te whakahau a ngā pirihimana ki te matapaki i ō rātou mahi urutomo mēnā kei reira ngā tamariki.  Engari ko tā Te Waiarani Harawira, kāre ano ngā pirihimana kia huri i o rātou tikanga mo tērā mahi.

Ko Waiarani Harawira tēra e mea ana kua wareware katoa rātou, nga pirihimana, i wā rātou i whakarite ai. Otira i tae mai anō rātou ki te kainga o tana tungane, ka puhipuhihia te whare, a, i te kainga tonu a rātou mokopuna.

Ko te kī a ngā pirihimana kua tatu tētahi whakataunga ki waenga i a rātou me Tūhoe mo te kaupapa Operation 8.  Kei te hunga ngā whakamārama mo tērā kaupapa.  Engari mo te whānau o Rameka Teepa ka noho tonu te wehi ki ngā pirihimana.  Ko tōna tikanga ka hoki mai ngā pirihimana ki te hapori o Rūātoki ki te tuku whakapāha i roto i ngā wiki e rua.