Minister concerned about RNZ Māori content

Wepiha Te Kanawa
  • Te Tai Tokerau
  • Tāmaki Makaurau
  • Te Waipounamu

He hui ki waenga i te Minita Whakawhanake Māori me Te Minita Take Pāpāho te hua o ngā āwangawanga e rere ana mō te iti o ngā kaupapa Māori e puta ana i Te Reo Irirangi o Aotearoa. I karanga ohoreretia te hui whai muri i te pūrongo a Irirangi Wātea mō te ratonga irirangi ā-motu e mea ana, i roto i ngā wiki e rua, he kotahi me te haurua haora noa iho te nui o tana whakapaoho i ngā take Māori.

Hei tā te Mātanga Reo Irirangi Māori tā Haare Williams, ko te ruarua o ngā take Māori ki runga i te reo irirangi o Aotearoa he hua nō te aupēhinga o ngā tikanga Māori, “Ka nui taku whakahē, ko te kupu pākeha mō tēnei 'We have been betrayed'. Mai rā anō ko te tiriti o Waitangi, te hainatanga o te Tiriti o Waitangi. I muri mai i te whakairitanga o te pou haki a te Kuini ki a Point Britomart ki a Hobson, ka pēhia tāua, ka pēhia tāua ka takahia tāua, ka takahia tō tāua mana.

E ai ki te Minita Whakawhanake Māori ki a Te Ururoa Flavell, he mōrikarika te kore ira tahi ōrau o ngā kaupapa Māori ki runga i Te Reo Irirangi o Aotearoa, “Kāore i te tika tēnei mōmō āhuatanga, me kī tēnei rautau kua roa te ao Māori e tohe nei kia whai wāhi ki roto i ngā whiriwhiringa ā-pāpāho.”

Ā, hei tā te heamana o Te Whakaruruhau tā Willie Jackson, me whakautu e rātou ngā wero “Kei te hē tēnā, kei te hōhā mātou i tēnei wā. Koina te take mō te kōrero, mō te wero ki a rātou RNZ. Tika ana mō RNZ ki te kōrero e pā ana ki ngā iwi katoa, engari kua wareware tātou te iwi Māori.”

Kāore te Tumuaki Hanga Hōtaka o Te Reo Irirangi o Aotearoa a Carol Hirschfeld i te puta ki ngā pāpāho, ā, kāore hoki ia i whakaae ki tētahi uiui mā runga kāmera.

Kāore he mana tō ngā tatauranga,
kāore hoki he māramatanga i roto i ngā tatauranga a Jackson, ā, he whakapae wawe noa te iwa tekau mā iwa meneti.

I hui tahi te minita a Te Ururoa Flavell rāua ko te minita Pāpāho a Amy Adams, ā, ko te whakatau ka hui ia me ngā māngai o Te Reo Irirangi o Aotearoa.