Million Dollar makeover for Auaukiterangi Marae

  • Tāmaki Makaurau

He kotahi miriona tāra te wāriu o ngā whakatikatika kua oti ki Auaukiterangi, te whare tipuna o Maketū Marae, e iri nei ngā kōrero mō te ūnga atu o te waka o Tainui ki Kāwhia moana. Nō te ata hapara nei, whakahaerehia ai ngā waerea whakaihi i a ia.

I te pōuriuri tonu o te ata nei, i te īnoi o ngā iwi o Taranaki, i whakahaerehia ngā karakia me ngā waerea mō te whare tūpuna o Auaukiterangi, kua whakahoua.

E ai ki a Wharehoka Wano no Te Ati Awa, Taranaki hoki, “Ko te taki i te waerea, ngā karakia ki runga i te marae, i mua i te aroaro o te ware, huri rauna taki haere o ngā karakia e tika ana, na, ka hau atu i roto i te ware, ko pō tonu, i te mutunga mai, kua tūramahia ngā rama, ana, ka puta ki te wai ao ki te ao marama.”

Kei roto i te koroua nei e rima tekau mā whā tōna pakeke, e tāngia ana ngā kōrero o nehe mō ngā tāngata, nā rātou te waka o Tainui i urungi ki Kāwhia.

E ai kit e hemana o Te Ara Taura a Rāhui Papa, “Anei tō tātou hītori.  Koinei ko te pukapuka Māori, koinei ngā pikitia o te ao Māori, ko ngā tātai whakapapa, me ōna korero nui.”

Nā Kīngi Koroki a Auaukiterangi i puare ai i te tau ono tekau mā rua. Ko Hoturoa te rangatira o te waka o Tainui, ā ko Auaukiterangi tōna matua.  I tonoa te iwi o Taranaki ki te haere mai e Kīngi Tuheitia, hei whakapakari i te whanaungatanga, i te moe tahi o te tamāhine o Auaukiterangi i te rangatira o Aotea waka, a Turi.

“Ko Hinekiwa, te pōtiki, te kōtiro, te tuahine o Hoturoa, nō reira, i konā ka tino honohono ā whakapapa nei,” says Papa.

A te po nei ko ngā iwi o Taranaki ngā manuwhiri tuatahi ka moe i roto i te mahana o te whare koroua i whakahoua, ko Auaukiterangi.  Me te hoki mahara, i tōna wā, i kaha toro atu a Te Arikinui Te Atairangi Kaahu i waenga i a rātou moe ai, nō reira, ka moe rātou ki konei.

Hei tā Hoturoa Kerr no Ngāti Hikairo, ‘I roto hoki nei a mātou kua tīmata ake ētehi kaupapa hei whakaoho anō i ēnei kōrero ki ngā hinengaro o ā mātou nei rangatahi.//Koirā pea ngā huarahi hei hāngai pū i ngā mahi pēnei ki ā tātou rangatahi i tēnei rā.”

Āpōpō ka tū tetehi parakuihi whakamaharatanga mō Te Arikinui Te Atairangi Kaahu, i mate, i runga i tōna rā whānau.