Memories of Taniwharau resonates at Tomairangi Paki’s tangi

  • Waikato/Te Waiariki

E pari ana te tai o mihi ki Tainui mō te pou o ngā mahi ā-rēhia mō Kiritokia e-te Tomairangi Paki, koia rā kua takoto ki te aroaro o Waahi Paa.  Nā Kiingi Tuuheitia me te Kiingitanga ia i rahiri ki tēnā papa takahanga o rāua, ki reira tangihia ai hei ngā rā e whā e haere ake nei. 

Muia ana te marae ātea o Taane I Te Pupuke e te tini ngerongero o Waikato-Tainui ki te tuku mihimihi ki tō rātou pou i ngā mahi ā rēhia.I whakamānawa hoki ngā tohunga i ngā haka a tāne rore, nā rātou ia i poipoi i te ao haka.

E ai ki te Kaiārahi o Te Iti Kahurangi a Kingi Kiriona, “Kei te maumahara tonu ahau i ngā kōrero i puta i a ia i tā mātou huinga mā ngā kapahaka o Tainui i tērā tau, Ko tana kōrero he mea atawhai i a e te momo i a Wii Te Tau Huata, i te momo i a Kingi Ihaka, ēnei rangatira o āua wā rā i roto i ngā mahi kapahaka nō kōnā i whai kaha a ia ki te hautū i tana kapa haka o Taniwharau.”

Hei tā te Māngai o te Kiingitanga a Rahui Papa, “Ka ākona ki te waiata otirā ki a Napi Waaka ngēnā tūmomo tangata taniwha o tēnei mea o te waiata, ka mutu ka hoki mai ia ki roto o Hawaii, ka noho ia ki te ako i te hura.    Ka mutu ka hoki mai ki tēnei whenua ka haria mai ngēnā taonga hei poipoi māna mō roto mai o te kapahaka o Taniwharau, me ngā kapahaka whānui tonu o roto o Waikato.”

He kaiāwhina a Tomairangi Paki ki a Napi Waaka, nōna te kaiako mō te kapa o Taniwharau nā rātou ai i angtitū ki te whakataetae tuatahi o Te Matatini i te tau waru tekau mā tahi.  I ngā tau whai muri, nāna te rōpū i arataki.

He kapa haka nō pito kē o te motu, nō Waihīrere, Ngāti Kahungungu, Mātātua waka me Tāmaki Makaurau ka tau mai ki te poroporoāki i te taonga o te mate, ā ka whakaritea he pō whakangahau a te pō mutunga hei te Pōpare nei, kia whakanuia ai ngā mahi nui a Tomairangi Paki i ngā mahi ā rēhia.

Hei tā Kiriona, “Ko āna waiata kei te waiata tonutia, ko āna haka kei te hakaina tonutia.  Ko te wairua ngahau i poupouhia e ia ki tana kapa haka o Taniwharau kei te whāia e ngā reanga o nāianei e mātou te hunga hautū kapa haka o wēnei rā ki roto o Waikato, hurinoa i te motu, nō reira he momo  wahine tēnei kua riro nei, tēnei te tangi ake o te ngākau.”

Ka nehua a Paki i ngā rua kōiwi i te taha o tōna whaea me ngā rārangi Kiingi i te maunga tūpuna o Taupiri ā te paraire nei.