Kaupapa: Education

Me tūwhera Te Kareti o Hato Petera ki a tauiwi?

Wepiha Te Kanawa
  • Tāmaki Makaurau

Me tūwhera ngā tatau a Hato Petera ki a tauiwi kia ora tonu te kura, koirā te whakapae a Tākuta Ranginui Walker.  I puta ēnei kōrero i te aukatinga o te kura noho teina.

E ai ki te tauira ō-mua a Walker, me titiro tana kura tawhito ki ngā kōwhiringa katoa. “Mehemea ruarua noaiho ngā Māori, tērā pea me whakatūwheratia ngā kuaha ki ngā Pākehā, pai hoki kia piri atu te Pākehā ki te taha Māori kia mōhio rātou ngā whakanekeneke o te ao māori.”

Engari e ai ki te Minita Take Mātauranga a Hekia Parata, ehara tēnei raru ka pā ki ngā kura noho Māori anake, “Kei te mōhio tātou ehara tēnei take e pā ki a Turakina anake nē, ka pēnei ēnei raruraru mō ngā kura moe katoa, ahakoa Māori ahakoa Pākehā.”

Hei tā te Minita Whakawhanake Māori a Te Ururoa Flavell, “ Āe, ka whakakīkī ngā whārua engari e kore ērā āhuatanga e whakatika i ngā take e pā ana ki ngā kura ā-noho.”

I mea mai a Walker ki a Te Kāea, “He mate tēnei nō te ao hōu nei, i tīmata mai i te katinga o Tīpene, o Wikitōria, ā, ināianei kua kati a Turakina, me te mea nei kua āhua pā mai tēnā raruraru ki runga o Hato Petera.”

Me tuku āwhina te hāhi ki te kura hei tā Flavell i te kapinga o te kura noho teina, “Ko te tiaki i ngā tauira i roto i ngā kura ko te ia ka waiho ake ki roto i ngā ringaringa o ngā hāhi.  Engari kāore ngā hāhi i te tuku i ngā pūtea e tika ana ki te whakatikatika i ngā whare, ki te whakapaipai i tērā wāhanga, ka mutu kia utu i ngā nama e pā ana ki ngā kura.”

Hei tā Parata ko ngā kura auraki me ngā kura reo rua pea tētahi rautaki, “Kei te kite hoki tātou te pakari o ngā kura, o ngā kura reo e rua, o ngā kura auraki.”

Ka hui tahi te Poari o te Kura o Hato Petera me te whānau ki te āta titiro ki a rātou nekehanga, ki te whai rautaki hōu kia ora ai te kura.