Ngā kaupapa: Elections, Politics, Transport

Me tūtuki i a Reipa āna oati te āki a ngā kai-pōti o Te Waiariki

  • Tāmaki Makaurau
  • Waikato/Te Waiariki

Me tūtuki i a Reipa āna oati te āki a ngā kai-pōti o Te Waiariki ki te rōpū. Kei te whai tēnei i tā Jacinda Ardern whakapuaki i te kaupapa here waka whenua ā-rohe a te Rōpu Reipa ki Tauranga, e rua tekau miriona tāra te wāriu.

I rangatira te pōhiri ake a Tauranga ki a Jacinda Ardern i te whakaputanga kaupapa here waka whenua ā-rohe a Reipa.

Ko tētahi o ngā kaupapa ko te whakatūranga o te tereina kawe tāngata rua tekau mano tāra mai i Tāmaki, mā Kirikiriroa, puta atu ki Tauranga.

He whakaaro kua whakamānawatia e ngā kaipōti o Te Waiariki.

Ko tā Ruihi Shortland, he uri o Te Patuwai me Ngāti Awa, "E noho ana ahau i tēnei tau ki Tauranga Moana ēngari e mahi ana ahau ki Tāmaki Makau Rau nā reira he whakaaro pai tēna."

E ai ki a Ken Kennedy, kaumātua o Te Waiariki, "Hei aha ngā haere i roto i ngā huarahi, anā, whakahokia mai ngā tereina i runga i ngā ara."

Ēngari, ko tā ngā kaipōti, me noho tūturu a Reipa ki ā rātou kupu taurangi.

Ko tā tētahi uri o Te Patuwai, ko tā Reremoana Rota, "Māmā noa iho te whakaputa kōrero o rātou nā pere o te Pāti Reipa, pai te rongo atu ēngari ki te uru ki roto i te whare Pāremata me pono te kōrero."

E manakohia ana, mā te ara tereina ētahi tūranga mahi e whakawātea.

Ko tā Rota, "Mō te whakapai anō, mō te whakatika anō i te rori o te tereina ka whai mahi o mātou hunga rangatahi."

Ko tā Kennedy, "Te maha o ngā mahi ka puta mai i tēnei kaupapa nui mō tātou, mō a tātou tamariki mokopuna, haere atu ana ki te mahi, i te taha o ngā ara tereina mai i tēnei takiwā tae noa ki Tāmaki Makaurau."

I wawe te whakahoki kōrero a Nāhinara, ko tā te Mema Pāremata o Tauranga, te Mīnita Waka hoki a Simon Bridges, he wawata noa ēnei kaupapa i a Reipa.