Me rau atu te wai pūkōwhai ki ngā wai inu o Whakatāne me Ōhope?

Mere McLean
  • Waikato/Te Waiariki

I te Waiariki, hei tērā wiki tautohetia ai te whakaurutanga atu o te pū kōwhai ki ngā puna wai inu i te rohe o Whakatāne me Ōhope, e oreore ana ngā taha e rua o te tohe.

Ko Joe Harawira te māngai o SWAP, he rōpū kaimahi mīra rākau kua pākia e te paitini.  Hei tāna, me whānui kē ngā rangahau i mua i te whakaae ki tēnei huarahi.

Heoi, ki tā te poari hauora ā Toi, he nui ake ngā hua i ngā kino.

Tētē ana ngā niho o ētahi o te haukāinga i te kaupapa whakauru pūkōwhai ki ngā wai inu i te rohe o Whakatāne me Ōhope.

E rere ana te tautoko i te tari hauora ā-Toi mō te āpiti pūkōwhai ki ngā wai inu, ā, ko tā tētahi Mātanga Pouniho o tēnei rohe, mā konei e iti iho ai ngā whāwhārua oranga niho i waenga i a Ngāi Māori me Tauiwi.

Kua raua kētia te pūkōwhai ki ngā wai inu takiwā kē atu o Aotearoa, ā, ko tā te tāpaetanga pōti ā tērā wiki he whai kia whakaurua anō ki ngā wai inu o ngā takiwā o Tāneatua, Te Waimana me Murupara.

Rua tekau mā whitu ngā whenua huri noa kei te whakamahi i te pūkōwhai ki ō rātou wai inu, ahakoa te tōtara wāhi rua o ngā whakaaro ki Aotearoa nei, tērā pea koinei te ito o ngā mahi whakaora niho mō ngā morimori tae ake ki te hunga taipakeke.