Me mutu te mate wehi ki te takatāpui i roto i ngā mahi hākinakina

Taroi Black
  • Tāmaki Makaurau

Tata ki te iwa mano, e rima rau ngā tangata o ngā momo hōkakatanga katoa i whai wāhi ki tētahi rangahau e kī ana ko "Out in the Fields" hei whakamutu i te mate wehi ki te takatāpui i roto i ngā mahi hākinakina.

Ahakoa te wehi o ngā kōrero kua puta i te rīpoata, i rerekē te takahi a tētahi takatāpui i te ara tākaro rīki.

I a Tuhoe Tamaiparea e kura ana, i ākina ia kia tākaro e ōna hoa kapa rīki o te Kāreti o Ngā Puna o Waiōrea.  

Hei tā Tamaiparea, “Kāre au i te tangata ka tino whakapiri atu ki ngā tāne.  Koirā tētahi o ngā tino rerekētanga.  Ko te whakawhanaunga me te tūhonohono ki wāenganui i aku parata i te kura. Koira tētahi mea tino nui ki ahau.”

Ko ngā matakutanga mōna e takatāpui ana ko te tākaro mō tētahi kapa tāne, he whakahōtaetae hei eke māna.

Ki tā Tamaiparea, “Ko te akoranga te mea nui. Ki te kore te tangata e mōhio ki tētahi akoranga, me puta atu ia ki te ako.”

Engari whitu tekau mā tahi ōrau te hunga i uia i te ripoata tuatahi "Out in the Fields" mō te tūkino takatāpui i te āo hākinakina e mea ana, kāore ngā rōpū hākina rangatahi i te kaha tautoko, whakahaumaru rānei i a rātou. 

Ko Dion Hosking te kāpene mo te kapa pā whutupōro LYC Charges. 

E ai ki a Hosking, “Koinei tētahi kapa mā rātou, e noho mahana ai rātou ki wāenga i tēnei kapa, takatāpui mai, tangata mai.  Mōku ake he tapu te wairua o te tangata ahakoa ko wai."