Kaupapa: Tā moko/Kirituhi

Matangurunguru ana a Mahuta i te aukatinga o tētahi tangata mau moko i tētahi wharekai

  • Waikato/Te Waiariki

E ai ki a Nanaia Mahuta, i te taenga atu o tētahi kainoho o tana rohe pōti ki tēnei whare pakihi, he kaitahi me tōna whānau te whai.

Nā wai rā he take kawa ka ara ake ki te uri o Te Whānau a Apanui nā tana moko māngai.

Ko John Lawrenson te kaiwhakahaere o Keystone whare kai.  E pāpouri ana ia ki te aukatinga.

Kua whakaritea ināianei e John Lawrenson tētahi kaupapa here mō āna pakihi tekau mā toru.  Ka aukatihia te moko whakamataku, pērā ki ngā tohu kēnge, engari kaua te moko Māori.

Ko te pātai, nā te aha i takaroa ai?  He tūāhuatanga ōrite i ara ake e toru tau ki muri i tētahi paparakāuta ōna mō te moko Māori te take.

Arā noa atu ngā toki o te ao Māori e mau moko ana, ko te tumu whakarae o Te Taura Whiri i Te Reo ko Glenis Phillip-Barbara tērā, ko te kahurangi hōu ko Nganeko Minhinnick tētahi anō.  Heoi, ahakoa te kaha kitea, e whakahawea tonutia ana, tae rawa ki ngā tūranga mahi.

E ai ki te mātanga ture, ki a Mamari Stephens, me whakapakari ngā ture. 

I roto i ngā tau e toru kua taha, tekau mā toru ngā amuamu kua whakatakotoria ki Te Kāhui Tika Tāngata mō ngā mahi whakahawea nā te tāmoko te take.