Māori should utilise the UNDRIP - Professor Mutu

  • Tāmaki Makaurau

Ki Tāmati Makaurau ā te pō nei tū ai te tuatahi o ngā hui whakawhiti kōrero i Te Whakapuakitanga o te Rūnanga Whakakotahi i ngā Iwi o te Ao mō ngā Tika o ngā Iwi Taketake, e tata ana ki te tekau tau nō tana whakamanatanga. Ko te pātai ia, he aha ngā pānga o taua kawenata ki a tātou i Aotearoa, ā he aha hoki ngā rerekētanga kua hua ake i a ia?

E whakahaere ana te Kāhui Mōtika Tāngata o Aotearoa i huinga mā ngā mātanga hei matapaki i tāua Whakapuakitanga, kia mōhio pai ai ngā iwi Māori i ngā tikanga.

“Ki te whakataunaki, ki te whakatairanga ake i tēnei whakapuakitanga akene pea ka whai kaha, ka whai kaha i roto i ngā tono i roto i ngā mahi e pā tata ana ki te ngākau o ngā tāngata whenua,’ hei tā Hēmi Pirihi, te Kaiwhakarite Māori ki Kāhui Mōtika Tangata.

Otira e ai ki a Ahorangi Margaret Mutu me whakamahi i a ngāi Māori te Whakapuakitanga mō ngā tika o ngā Iwi Taketake.

“Ko tēnei kāwanatanga ki tōku nei titiro, e kore e hakarongo ana, engari mā te iwi Māori i tū i runga i tō rātou ake mana motuhake ki te kī atu, nōku tēnei whenua, nōku te kōrero, māku e kōrero mō aku mōtika tangata.”

I te tau rua mano tekau, i arahina e te Minita take Māori i tāua wā, e Tā Pita Sharples tētehi ope nō Aotearoa kia haina ai te kawenata.  I tēnei tau tonu, nā Ahorangi Mutu me te Kāhui Mōtika Tāngata o Aotearoa i whakatakato rīpoata mō te kore aro o te kāwanatanga ki te tautoko i ngā mōtika o te iwi Māori e pā ana ki ngā take kerēme, ngā kaunihera ā rohe me Te TPPA.

“Ehara te moumou taima, nō te mea kua kitea e te United Nations, ko tēnei te āhuatanga o tēnei kawanatanga i konei, kua tuhia ngā mea e whakahāwea ana i tēnei kāwana,” hei tā Ahorangi Mutu.

Hei ia marama e tū mai nei ka tū tētehi huinga nei, hei a mua i te tau tuangahuru o Te Whakapuakitanga, ā tērā tau.