Māori Party says justice system is flawed

  • Te Tai Tokerau

Kei te tōtara wāhirua ngā whakaaro i ngā pae ipurangi mō te mana rite o te whiu ki tētahi tokowhā Pākehā rangatahi i Te Taitokerau, i hāmenehia mō te whānako taputapu, e waru tekau mano tāra te wāriu. He whiu ngahi hapori te utanga, ā, e whakapono ana ētahi, me he māori ēnei kai-whānako, kua taikaha ake te whiu.

E kore tēnei tokowhā e kite i te whare herehere mō te mahi whānako. E ai ki te mema Māori ki a Marama Fox, e kore hoki te Māori e pēnei te waimarie.

“Mehemea he Maori ka haere totika ki te whare herehere, koira te raru ki mua a tatou.”

He whiu ā-kāinga me te whaina noa ngā whakawhiu mō te whānako i ngā rawa, e waru tekau mano tāra te wāriu, ki te Taitokerau.

“Me pehea te whakatika i te punaha kooti nei kia orite te whakatau i te tangata ahakoa Maori, Pakeha, tauiwi ke atu.”

E ai ki a Tiati Harvey, he 'tino waimarie' ngā taitama rā, mei kore ake te tautoko a ō rātou whānau, roia hoki i kore ai he whiu herehere mā rātou.

E ai ki tētahi mātanga turea Mamari Stephens, he rerekē te otinga mō ētahi Māori.

“Ko tetahi o nga painga a te tiati, kei hea te whanau o tenei tangata, ka taea te whanau te whakapakari i tenei taiohi. He aha te painga o te whakawhiu kei roto o te hapori? Ka hara ano te taiohi i tera tumomo whakawhiu pea.”

Ka rongo te ao ipurangi i te kēhi a Korotangi Paki, te tamaiti a Kingi Tuheiti. Kihai ia i kite i nga whiu mo te whanako rawa na runga i tona mana i te Ao Maori. E hiahia ana a Fox, kia orite te tangata i raro i te maru o te ture.

“Ma te kawana ano ratou e whakatikahia i o ratou hara. Me rangahau tatou i te tuatahi kia kite kei hea te he, kei hea nga raru katahi whakatikahia.”

E awangawanga ana te Sensible Sentencing Trust kei hara mai ētahi atu i te kaha māmā o te whiu, engari tāria te wā mena ka whāia tēnei tauira.