Māori offer support to whānau of killed Aboriginal teenager

  • Ahitereiria

Kei te whakakotahi atu te hapori Māori i Te Uru Pū ki te whātoro atu i te ringa āwhina ki te whānau o te tamaiti iwi taketake, he tekau mā whā ōna tau, ko tōna whakamatenga i pakaru mai ai te riri ki taua takiwā. E ai ki nga rīpoata, nā te riri kaikiri ia i mate ai. 

Nō ngā iwi Yamagi me Wonkata a Elijah Doughty, e tekau mā whā tōna pakeke. He tamaiti harikoa tōna āhua.

Hei tā Maihe Nikora he hoa ki te whānau, “Hei tuku i to matou aroha a nga maori o Kalgoorlie nei e mahi tahi ana ki te awhina atu ki te tautoko ki te tuku takoha ki te tuku poroporoaki ki te tuku moteatea ki te tuku karakia hoki i to ratou taha tika o te whanau te whanau kua pani nei.”

Nā tōna matenga i pakarū mai te riri ki te ara matua o Kalgoorlie, ki waho hoki i te kōti o taua takiwā.

“Ka kite i wawahia te taiapa wahia te keeti waahia nga matapihi o te whare kooti tonu te putanga mai o te riri kaare i te tika kia utaina atu ai tetahi hara kaare i eke ki te rahi pea o tenei hara kei runga i ona ringaringa te toto o te tamaiti nei.”

E ai ki ngā rīpoata i pupū ake te riri i te tū a tētahi tangata rima tekau ma rima tau te pakeke ki te kōti mo te whakapae matenga pokerehu. Kei te māharahara a Maihe he take kaikiri pea tōna matenga.

“Tera ahuatanga o te kaiakiri kaare i te rerekee kaare i te rereke na reira nga iwi moemoea moemoea ka nui te aroha ki a ratou.”

E ai anō ki ngā rīpoata kāre te tangata me tana whakapae matenga pokerehu e tū anō ki te kōti engari ka tū a rīpene ataata ke ia.