Māori MPs want Māori whānau court

  • Tāmaki Makaurau

E hiahia ana ngā mema Māori a Te Pāti Māori, a Reipa me Ngā Kākāriki te whakatū i tētahi Kōti Whānau Māori. E whai ana tēnei i te karanga a ngā kaumātua o Te Puea marae mō te tūpono ka tū tētahi kēhi whakahē i tā rātou heamana a Hurimoana Dennis, kia whakatūria ki runga marae.

E kaha taunaki ana a Marama Fox i te hiahia o ngā kaumātua o te marae o Te Puea, kia whakatau ai te whakawhiu whakapae kāhaki ka tau ki tā rātou pou māngai a Hurimoana Dennis, i raro i ngā tikanga Māori.

“Ki tā Hurimoana, kua kite mātou i tōna kaha ki te akiaki te whānau noho kainga kore, rātou kua patua te wairua, kei hea ake i te marae te wāhi pai kia tutuki ēnei momo kōrero e pā ana ki a ia.”

Kei te tautoko hoki ngā mema Māori a Marama Davidson rātou ko Peeni Henare i te karanga o te marae.

E ai ki a Davidson, “He tūranga mai rānō mō te Pāti Kākariki ki te whakamana i ēnei momo tikanga whakahaumanu mō ia marae, mō ia hapori, mō te whānau mō ngā rangatahi hoki.”

Hei Tā Henare, “He whakaaro pai tēnā, he whakaaro rangatira te kite atu i ēnei momo take ka tau ki runga i te marae, nō reira kōwhirihia mehemea ka aha.”

Nō te tau rua mano mā waru i tū ai te kōti rangatahi tuatahi i te marae, i raro i te reo Māori me ngā tikanga Māori, kia kaua ngā rangatahi Māori e hara anō.  E ai ki a Marama Fox, kua kōrero kē ia ki te Minita Tāhū o te Ture, Ngā Kōti anō hoki ko Amy Adams, mō te whakatūnga o tētahi kōti Whānau Māori.

“Ko te ture tonu te ture, kāore mātou e hiahia kia tini te ture, engari ko te āhua whakawā kei raro i ngā tikanga o ngāi tātou, nā, koirā te kōrero kua whāriki kē nei ki mua i te aroaro o te minita,” hei tā Fox.

I tuku tono ahau ki te Minita Tāhū o Te Ture me Ngā Kōti a Amy Adams ki te uiui i a ia mō te kaupapa nei, engari, kāore ia i te wātea, tē tāea hoki te whakaputa tauākī.