Māori Language Week parade attracts thousands

Heta Gardiner
  • Te Whanganui-ā-Tara

E hia kē nei ngā manomano tāngata i taki huihui mai ki te puku o Te Whanganui-a-Tara i tēnei rā ki te whakanui i te tūtira tuatahi rawa mō te wiki o te reo Māori. I tēnei tau, a āki Te Taura Whiri i Te Reo Māori i te iwi, ki te hiki i te mānuka kia Ākina te Reo.

Ko 'ākina te reo' te karanga matua mō tēnei te huringa tau 41 mō Te Wiki o te Reo Māori. Ahakoa tērā, ko te whakarite tūtira ki Pōneke, he āhuatanga hōu. Engari mena ko te tokomaha o ngā kaihīkoi te tohu o tana tutukitanga, kua ora katoa te kaupapa.

Hei tā Tātere McLeod o Te Mātāwai, “Titiro ki te mātotoru o te tangata kei konei. Kei hea he tohu i tu ātu i tērā, o te hiahia o tō tātau iwi ki te reo.”

Hei tā Wayne Ngata o Ngā Pae o te Māramatanga, “Ko ētahi e āhua kotiti ana te haere! E haka ana ētahi, e waiata ana, e kanikani ana!”

Aa kua pāngia te aroha ki te kaupapa, e tetahi o ana māngai.

Hei tā Julian Dennison, “Our school just brought te reo Māori into the school, I'm learning it in little baby steps.”

Engari kaore te katoa i te rongo i taua hiakai.

18% noa o te iwi māori, e mōhio ana ki te kōrero Māori.  Ka heke taua whika ki te toru ira whitu paihēneti noa mō te whānuitanga o Aotearoa.  Aa iti iho i te kotahi paihēneti mō ngāi Pākehā mā.

E ai ki a Te Ururoa Flavell o te Pāti Māori, “Ko te hīkoi anō te hīkoi, ēngari ko te hīkoi nui, e pā ana ki te oranga tonutanga o tō tātau reo.”

He wero kia kaua te aronga o ki reo Māori, e puea ake, mō te wiki kotahi noa.