Manurewa Marae opens doors to homeless 'for the community's sake'

Rahia Timutimu
  • Tāmaki Makaurau

Nō te rangi nei, whakatūwhera ai ngā tatau o te Marae o Manurewa ki te hunga kore kainga. Ka huaki te marae, ngā whare hīkawe hoki ki ngā whānau, ngā tāngata hoki e noho kainga kore ana.

Hei tā Tūnuiarangi McLean o te Poari o Manurewa Marae, “Ko te take kei te whakatuwhera, ko te pūtake ko te hapori. I tuwhera i te wā o Te Puea ki te tautoko i te tono. Tēnei whakatuwheratanga ki te hapori ināeanei.”

He kaupapa i whakarewa i te rangi nei i raro o te maru o Whakapiki Ora, hei āwhina i te hunga kore kainga. Kua kawea mai he whare hīkawe hei whakaruruhau i ngā tāngata.

Hei tā McLean, “Ko tōna kaupapa ko te pō mārie, ko ngā whānau, ngā tamariki, ka haramai ia po, moe ai, kai ai, horoi tinana, ērā momo āhuatanga. Ērā momo whānau ka eke ki te 98 ngā tāngata. Te wāhanga tuarua, ko ngā whare nei, e rima ngā whare, e toru tekau ngā tāngata ka uru i roto i aua whare. Ko te kaupapa e mahi tahi ana me ngā tari kāwana, kia mahi tahi me ērā o ngā momo whānau, pērā i te MSD, te WINZ. Te mea tuatoru, mō ngā tane anake, tekau ngā tāne e ahei te moe ki konei.  Ka hipa i te tahi rau ngā tāngata ki tēnei kaupapa.”

Inā te maha o ngā whānau i toro mai ki te ringa āwhina nei i te rangi nei, ko te nuinga e whai pēpi ana.

Hei tā McLean, “Ko te mea nui, ko ngā whānau, me ō rātou tamariki , mātua, koira te mea nui kia matou i tēnei wā. Kare ano kia tae mai ngā whanau matua tahi nei.”

Tekau mā rua wiki te roa o te kaupapa nei, ka whakahaerehia mō ngā rā e whā o te wiki.