Manurewa Marae look at alternative housing for homeless

  • Tāmaki Makaurau

Kei te āta titiro te marae o Manurewa kia toro atu i te ringa āwhina ki te marae o Te Puea hei whakaruruhau i te hunga kainga kore. Kua matapakihia e te marae tēnei take i te rā nei.

Ka tāwharau te whare tupuna nei o Mātukurua i ngā whānau kaingakore o Tāmaki Makaurau.

Hei tā Tunuiarangi McLean he māngai ki Manurewa Marae, “Kia kawehia mai ngā whānau mai Te Puea, pōwhirihia, whakatauhia i runga i te marae ātea, o tēnei marae o Manurewa.”

E hui ana ngā kaimahi o te marae mō te wā tuatahi i te rā nei, ki te āta kōrero, me pēwhea rātou e whakaruruhau i ngā whānau tāpiri i te marae o Te Puea.

“Kia rite tonu te whakahaere ki ērā i runga o Te Puea, me tā mātou tautoko i tā rātou i kōrero ai.  Ka mutu tēnei kaupapa i te Akuhata.”

Inā te rahi o te whenua o Manurewa Marae, engari, he ruarua noa ngā whare.  E īnoi atu ana rātou ki ngā rōpū hapori ki te takoha i ngā ruma hikawe.

“E rima wēnei ngā momo whare ka whakatūhia mātou, kia taea te noho haumaru ngā whānau ka hara mai, kia taea.”

Inanahi i tūtaki ai ngā kaimahi o te marae nei i ngā kaimahi o Te Puea ki te titiro ki ā rātou mahi manāki i ngā whānau, me te whiwhi whare anō hoki.  Ko te aronga i tē rā nei, he hāngai i ngā tikanga whakahaere ki ngā hiahia o te hapori me te marae.

“Ko te hiamana o te poari o Manurewa kua kī mai, kua tukuna mai tōna tautoko, ko te hiamana o te tarahiti o Wiri, ko ngā whare karakia o roto o te hapori nei o Manurewa, ngā kura, kua tukuna ō rātou tautoko.”

Ā tērā wiki hui ai te marae me te hapori ki te whiriwhiri me pēwhea rātou e mahi ngātahi ai ki te āwhina i ngā whānau rawakore.