Mai anō te Māori i Te Matau a Māui e ngaua ana e ngā whakataunga a te kaunihera

Aroha Treacher
  • Te Tai Rāwhiti

Ko te whakarauora anō i te taiao o Te Matau a Māui kei te ito o te karanga a ngā tāngata whenua kia whakahōungia katoatia ngā kaikaunihera o te kaunihera a rohe o Te Matau a Māui. E ai ki ngā iwi mana whenua, mai anō, mai anō te Māori e ngaua ana e ngā whakataunga a te kaunihera.

"E raru ana te hauoratanga o tō tātou nei iwi, nā te ngā hē a te karauna me te kaunihera a rohe aua raru katoa, nā reira me poro o rātou tūranga mahi katoa, me kuhu mai ngā kaikomihana ki te mahi i te mahi," tā Toro Waaka.

E rērere ana ngā whakahē mō te māuiuitanga piropiro, te pokenga o te kaimoana, me ngā para o ngā mahi poro rākau.

"I puta ai ēnei kōrero nā te riri o ngā tangata whenua, ki tāku he anga whakamuri taua whakaaro, nā reira me ako tātou i ngā hē o mua kia anga whakamua tātou, kia mahi ngātahi i ngā tangata whenua ki te whakarauora i te taiao," tā James Palmer, tumu whakarae, HBRC.

E toru tekau mā rima piriona tāra ka whakapaua e te kaunihera  ki te whakatō tipu, whakatika horo whenua, whakarauora anō hoki i ngā tini o Tāne Mahuta.

"Kei te timata tātou ināianei ki te whakatikatika i te taiao, ahakoa he nui te mahi kei mua i te aroaro, he timatanga pai tēnei," tā Palmer.