Kaupapa: Education

Mahea ake ngā kapua pōuri mā Hato Petera

  • Tāmaki Makaurau

Ka tirohia e te Kaitiaki o te Kāreti o Hato Petera kia tū hei kura moni matua.  I rangirua ai te oranga o te kura i ngā marama ki muri, heoi kua takahuri te Tarahiti Whānau o Hato Petera i nga ahuatanga o te kura, kia hoki ano ki te pai.

Kia tū pūtea motuhake te tirohanga whakamua mō te tarahiti Whānau o Hato Petera.

Hei tā Murray Painting, Heamana o Te Tarahiti Whānau o Hato Petera, "Ehara tātou he pūtea.  E rapu ana tātou i ngā rauemi me ngā taputapu nō te whānau katoa, ko rātou e kōha ki a tātou."

E whia wiki te whānau o Hato Petera e whakahou ana, nō tērā wiki i whakamanahia ai e Te Tāhuhu o te Mātauranga ngā tikanga whakahaere me te hanga o ngā kainga noho e rima.   Anei te hua, ka pōwhiringia ngā tauira hou.

E ai ki a John Matthews, te tumuaki o Hato Petera, "Kore tāea te māngai te hakapuaki te aroha, mō rātou i hakapōkai kaha nei kia tū tika ai i ō tātou whare, ā tātou noho manga, ināianei, tūwhera tonu ana ngā kūaha."

Hei tā Painting, "Tino pai te wairua o tātou katoa. Kua tūtaki ana mātou te kaupapa, he ahakoa he kaupapa rahi, he kaupapa uaua, kua tutuki mātou i tērā kaupapa."

Ka waimarie tēnei o ngā tauira hou, a Indi Tohu-Locke, nō Taranaki, kua whiwhi kura hou, whai muri i te whakakapinga o tōna kura o mua i tērā tau, ara, Te Kāreti mō ngā Kōhine Māori o Turakina.

I raro i te tautoko me ngā tūmanako o tōna whānau, e whērā ana i ngā mātua katoa mō ā rātou tamariki.

E ai ki tētahi matua kēkē, tā Mark Smith (Ngāpuhi), "Me tae ake rā taku kōtiro ki te tikitiki o te ao, ki ngā ara poutama, otira ki te tihi o tōna maunga, ko Taranaki tērā."

Hei tā Matthews, "Ā mātou nei wawata kia tū rangatira ā tātou tamariki."

Ka rapua hoki te pūtea tautoko a ngā rōpū tuku moni e te Tarahiti Whānau, whērā i Te Pouhere Taonga, hei whakarahi ake i tā rātou puna pūtea ki te whakatika i te toenga o ngā kainga noho, me ngōna wāhanga.