Mā wai rā a 'Tautoko' e taunaki?

Aroha Treacher
  • Te Tai Hauāuru

He āhuaranga e whakatōkenekene ai a taringa, ka mutu ko te reo e whakamanawawera ana i ngā kaitaunaki a Tipene Harmer i a rātou e tatari ana ki te putanga motuhake mai o tāna kopae hōu.

He mahi aroha tēnei, he kōpae e whakamārama ana i tōna arohanui ki āna tamariki me ōna wheako i tōna ake whakatupuranga i te kainga.

E ai ki te korokē nei, ki a Tipene Harmer, nō Ngāti Kahungunu,  Ngāpuhi me Ngāti Porou e mea nei “He mea miharo te noho Māori i tēnei ao, ā, ko taku tino hiahia kia kawe atu ōna āhuaranga katoa ki te ao. Koirā tonu te pae tawhiti i tēnei wā”

I tupu ake a ia i Pāharakeke, he tekau mā rima ngā tau te roa e mahi ana a ia i te whare patu miiti, engari kua wehe atu a ia i taua mahi kia whai atu ai i te ao pūoro. E whakamihi atu ana hoki ia ki ngā wāhine i tōna ao, mātua rā ko tōna māmā kua wheturangitia.

Nā te putanga mai o tāna waiata "West Side Hori" i te tau rua mano tekau mā rua i aro te ao pūoro ki a ia. I hono atu hoki a ia ki Empire Records.

Ko tā Tipene e mea ana “ko te whakaputa i te katoa te aronga nui, koirā tāku e kaha hiahia nei te whakaputa atu, hei whainga mā te hunga taurikiriki”

He tekau mā ono ngā waiata i runga i te kōpae "Tautoko", i mahi ngātahi hoki ia ki ngā tino toki pēnei i a Che Fu rātou ko John Chong Nee me Dam Native.

Hei taana anō e kii nei, “Ko te mahi tahi ki ērā o ngā ika-a-whiro o te ao pūoro he mea ngāwari ki te tangata, pēnei i tō tāua nei kōrero i te rā nei”

Kāti, mō ngā rā tata tonu nei e haere ake nei, ka noho roa tonu ko ōna haora mahi i te ao, i te pō kia whai hua mārika ai tōna kōpae i mua rawa i tōna putanga mai.