Ngā kaupapa: Entertainment, Te Reo Māori

Mā Pouroto Ngaropo te whāinga reo rua a Whakaata Māori e hiki ake

Wepiha Te Kanawa
  • Tāmaki Makaurau

I whakatau a Whakaata Māori i a Pouroto Ngaropo te Tūmuaki Pūmanawa Tangata, he tūranga hōu tēnei ka aro ki te reo Māori me ōnā tikanga.  E manako ana te Tumu Whakarae a Paora Maxwell mā te tūranga hōu nei ka tutuki tana whai matua, kia reo rua ai ngā kaimahi katoa a te tau rua mano rua tekau.

Ko ngā karakia wairua ērā e kīkī ana ngā hōro o Whakaata Māori, te kāinga hōu o Pouroto Ngaropo, ārā te Tūmuaki Pumanawa Tangata hōu.

E ai ki a Ngaropo, “He whakapono nōku kia hiki ake to tātou reo ki taumata kē atu, ā, ka mihi ki te hunga nā rātou te kākano i whakatō.”

Ko te Tumu Whakarae o Whakaata Māori tērā a Paora Maxwell e ārahi ana ia ki ngā koko o te whare.

E ai ki a Paora Maxwell, “Ko te whakawhanake i tētahi rautaki kia whai wahi ai nga kaimahi o Whakaata Māori ki te ako i te reo, nā te mea ko tētahi o ngā tino whāinga o Whakaata Māori kia reo rua ngā kaimahi o Whakaata Māori a te tau 2020.”

E ai ki a Tā Toby Curtis, “Ngāwari noa iho ki a ia ki te whanawhana, ki te wherawhera i ngā pūtake o tēnā kaupapa, o tēnā kaupapa.  Heoi anō kei a ia katoa ngā ngāwaritanga o tēnei mea te whakapapa.”

Ko ngā kaupapa matua a Pouroto ko te taha ki te reo Māori me ōna tikanga.

E ai ki te rangatira o Ngāti Awa a Hemana Eruera Manuera, “Kua hīkoi ia te hīkoi o te ao, kua kautia e ngā awa pokepoke, kua pikihia e ngā maunga taumata ki te rapu rā i ngā mātauranga, ki te rapu rā i ngā taonga tuku iho.”

E ai ki tana hoa tata a Awanui Black, i pupū ake tana aroha o te ao Māori i a rāua e tamariki tonu ana.

“He ngākau nui rawa atu ki te ao Māori mai rānō i a māua e tamariki ana, tae noa mai ki tēnei wā.  Ngākau nui ki tōna ao Māori.”

Kei te hīkaka te wairua a Pouroto, “Kua tae mai te wā kia neke atu tātou ki taumata kē atu, he reo rangatira, he reo ātaahua, he reo matua, he reo tuākana.”

Ka tīmata motuhake a Poutoro Ngaropo i tana mahi hōu i te rā nei.