Kaupapa: Education

Mā ngā whakahōutanga ka tūwhera tonu pea a Hato Petera i tēnei tau

  • Tāmaki Makaurau

E puku mahi ana ngā ringa rehe me ngā kaitaunaki o te Kura Tuarua o Hato Petera ki te whakatikatika i ētehi o ngā kāinga noho o te kura mō te kore utu.  Ko te tūmanako o te whānau kaitiaki o te kura, mā konei e whakatūwhera anō ai ngā tatau o ā rātou whare whakanoho tauira i mua i te tīmatatanga anō o te kura mō tēnei tau.

E rua noa iho ngā wiki kei te toe, e whakapau kaha ana ngā kaitūao kia tūwhera tonu te kura i tēnei tau mō ngā tauira ono tekau mā waru.

Hei tā tētahi kaumātua o Hato Petera, tā Paora Kanara, "He kaupapa tawhito tēnei, ināianei kua tirohia, me whakamahi mātou kia tika ai te tū o tō tātou kura, kia taea ai ō tātou tauira, kia hoki ai ā-tīnana mai ki roto o tātou kura Māori."

Nā te Tarahiti Whānau hōu te karanga ki ngā tauira ō-mua, o nāianei hoki me te hunga tautoko, ki te āwhina, ā, kua tae mai.

Hei tā Nicholas Buster Harris, he tauira ō-mua, "Nā te aroha mō tō tātou kareti, kua kite au, e heke ana ki raro, he aha te huarahi tika kia hiki ai tō tātou mana ki ngā maunga teitei."

E ai ki tētahi atu tauira ō-mua, a Mikaere Heihei, "Haere mai au ki tēnei kura i ngā tau kua pahure, kāore au pīrangi tēnei kura ki te kāti, nō reira, me haere mai au, ki te āwhina, ki te tautoko."

Ahatia te hiahia o Te Taumata o Te Hāhi Kataorika ki Tāmaki, ki te kati i te kura mō te tau kia oti pai ai ngā whakahoutanga kia tutuki i ngā whakahau a te Tāhūhū o te Mātauranga, ka haere tonu ngā mahi.

Hei tā Kanara anō, "Kia whakakīkī i ngā whāruarua o tō tātou kura i ngā tauira, ngā tauira Māori, mai i ngā tōpito o te motu , kia tū rangatira ai tō tātou kura mō ngā tau e heke mai nei."

"Ki a rātou kua mahia, kanohi kitea, kanohi mahi, pīrangi ahau ki te hoatu te aroha ki a rātou," ko tā Heihei kōrero.

Ko te whakatikatika i ngā wāhanga katoa o te kura mō ngā tauira kotahi rau, ono tekau te whāinga matua, arā, ngā kāinga tekau, te puna kaukau, te papa tēnehi me te netipōro hei te tīmatanga o te rua mano tekau mā whitu.