Mā McLean pea e whakakii ai ngā pūtu o Sharples

  • Tāmaki Makaurau

Ehara a Tunuiārangi McLean i te tauhou ki tēnei mea te take tōrangapū.

“I tū au mō Manurewa nei, mō te Pāti Māori anō, heoi ano tērā o ngā tūranga i roto i ngā rārangi Pākehā, pōtihanga Pākehā, ko te wawata i tērā wā i te whai i ngā pōtihanga ā-rōpū.

Nā te mea kei te heke mai tō tātou rangatira a Pita, a Takuta Pita Sharples i tēnei pōtihanga, ā, ka whakaaronui au kia tū mō tēnei tūranga.”

Nā reira kua mārama kē a ia ki ngā piki me ngā heke o te ao tōrangapū, ā, kua tīmata kē tana hīkoi whai whakaaro mai te iwi.

Ko te mea nui kia Tunuiārangi McLean tua atu i te rapu mema hōu mō te Pāti Māori, ko te whakahoki mai i ngā mema i wehe atu i te Pāti i roto ngā tau.

“He maha ngā kaumātua, kuia kei roto i tēnei takiwa, me taku whakapā atu ngā rōpū pēnei i Te Tai Tonga, kapa haka nei, me ngā marae hoki, i runga anō te tono atu ki a rātou kia hoki mai.”

Otirā, mehemea kāre a ia e waimaria i tēnei hikoi āna ahu atu ki te wā pōti, ka pumau tonu a ia ki te kaupapa, ka tautoko kaha tonu a ia, i te Pāti Māori ahakoa ko wai ka tohua hei kawe i te tūranga o Pita Sharples.